पणजीः एफसी गोवातर्फे (FC Goa) गतमोसमातील इंडियन सुपर लीग (Indian Super League) फुटबॉल स्पर्धेत युवा आघाडीपटू ईशान पंडिता (Ishan Pandita) याला मैदानावर जास्त वाव मिळाला नाही, बदली खेळाडू ठरल्यामुळे तो सामन्याच्या अंतिम टप्प्यातच खेळताना दिसला. आगामी मोसमात त्याला मैदानावर जास्त वेळ खेळायचे असून त्यादृष्टीने त्याने नव्या संघात दाखल होण्याची प्रक्रिया सुरू केली आहे. आयएसएलच्या 2021-22 मोसमात 23 वर्षीय पंडिता एफसी गोवाच्या जर्सीत दिसणार नाही हे पक्के असून प्राप्त वृत्तानुसार, जमशेदपूर एफसी (Jamshedpur FC) त्याला करारबद्ध करणार आहे. त्यादृष्टीने एफसी गोवा संघ व्यवस्थापन सहमत झाले आहे. आगामी मोसमासाठी एफसी गोवाने स्पॅनिश स्ट्रायकर येराम काब्रेरा याला करारबद्ध केले आहे. गोव्यातील संघाच्या आघाडीफळीत तो हुकमी एक्का असेल.

एफसी गोवाचे प्रशिक्षक हुआन फेरांडो यांनी गतमोसमात पंडिताचा ‘सुपर सब’ या नात्याने खुबीने वापर केला. ११ सामन्यात तो फक्त १३१ मिनिटे खेळला. उपयुक्तता सिद्ध करताना स्पेनमध्ये युवा गटात व्यावसायिक फुटबॉल खेळलेल्या या आघाडीपटूने चार गोल नोंदविले. पंडिताच्या मोक्याच्या क्षणी गोल करण्याच्या कौशल्याने भारतीय सघाचे प्रशिक्षक इगोर स्टिमॅक यांनाही प्रभावित केले, त्यामुळे तो भारताकडून आंतरराष्ट्रीय पदार्पण करू शकला. तो कारकिर्दीतील पहिला सामना ओमानविरुद्ध या वर्षी २५ मार्च रोजी खेळला. वृत्तानुसार, जमशेदपूर एफसीचे प्रशिक्षक ओवेन कॉयल आगामी मोसमात पंडितास जास्त वेळ खेळविण्यासाठी इच्छुक आहेत. त्यामुळे पंडिताने एफसी गोवास सोडचिठ्ठी देऊन जमशेदपूरशी किमान दोन वर्षांचा करार करण्यास पसंती दिली आहे. स्पेनमधील तृतीय विभागीय स्पर्धेत लॉर्सा एफसीकडून खेळलेल्या पंडितास गतवर्षी एफसी गोवाने करारबद्ध केले होते. आयएसएल स्पर्धेव्यतिरिक्त तो एएफसी चँपियन्स लीग स्पर्धेतही एफसी गोवातर्फे खेळला होता.