Arshdeep Singh: भारत विरुद्ध श्रीलंका यांच्यात मंगळवारपासून तीन सामन्यांच्या टी20 मालिकेला सुरुवात झाली. या मालिकेतील पहिला सामना मुंबईतील वानखेडे स्टेडियमवर होत आहे. या सामन्यात श्रीलंकेने नाणेफेक जिंकली असून प्रथम क्षेत्ररक्षण करण्याचा निर्णय घेतला आहे. दरम्यान या सामन्यासाठी वेगवान गोलंदाज अर्शदीप सिंग प्लेइंग इलेव्हनमध्ये निवडीसाठी उपलब्ध नव्हता.

बीसीसीआयने दिलेल्या माहितीनुसार अर्शदीप सिंग हा श्रीलंकेविरुद्धच्या पहिल्या टी20साठी उपलब्ध नाही, कारण तो आजारातून पूर्णपणे बरा झालेला नाही. दरम्यान, त्याला कोणता आजार झाला आहे, याबद्दल बीसीसीआयने माहिती दिलेली नाही.

भारतीय संघाकडून दोघांचे पदार्पण

अर्शदीप निवडीसाठी उपलब्ध नसला, तरी या सामन्यातून भारतीय क्रिकेट संघाकडून शुभमन गिल आणि शिवम मावी यांचे आंतरराष्ट्रीय टी20 क्रिकेटमध्ये पदार्पण झाले आहे. शुभमन भारताकडून टी20 खेळणारा 100 वा आणि शिवम 101 वा खेळाडू ठरला.

दरम्यान, शिवम मावीचे हे आंतरराष्ट्रीय पदार्पण देखील ठरले आहे. त्यामुळे तो भारताकडून क्रिकेट सामना खेळणारा 391 वा खेळाडू ठरला आहे.

शुभमन गिलने यापूर्वी भारताकडून कसोटी आणि वनडे क्रिकेट खेळले आहे. त्याने या दोन्ही क्रिकेट प्रकारासाठी भारतीय संघात त्याची जागाही जवळपास पक्की केली आहे. आता त्याला टी20 मध्ये भारतीय संघाकडून चांगली कामगिरी करत स्वत:ची प्रतिभा सिद्ध करण्याची संधी आहे.

(Arshdeep Singh wasn't available for selection for the 1st T20I against Sri Lanka)

हार्दिक पंड्या कर्णधार

भारत विरुद्ध श्रीलंका टी20 मालिकेसाठी रोहित शर्मा, विराट कोहली, केएल राहुल, श्रेयस अय्यर यांसारख्या खेळाडूंना विश्रांती देण्यात आली आहे. त्यामुळे या मालिकेसाठी भारतीय संघाचे कर्णधारपद हार्दिक पंड्याकडे आणि उपकर्णधारपद सूर्यकुमार यादवकडे सोपवण्यात आले आहे.

पहिल्या टी20 सामन्यासाठी भारताची प्लेइंग इलेव्हन -

इशान किशन (यष्टीरक्षक), शुभमन गिल, सूर्यकुमार यादव, संजू सॅमसन, हार्दिक पंड्या (कर्णधार), दीपक हुडा, अक्षर पटेल, हर्षल पटेल, शिवम मावी, उमरान मलिक, युजवेंद्र चहल.