India vs Australia, 4th Test: भारत विरुद्ध ऑस्ट्रेलिया संघात गुरुवारपासून अहमदाबादच्या नरेंद्र मोदी स्टेडियमवर कसोटी मालिकेतील चौथा सामना सुरु झाला. या सामन्याला भारताचे पंतप्रधान नरेंद्र मोदी आणि ऑस्ट्रेलियाचे पंतप्रधान अँथनी अल्बानीज यांच्या उपस्थित सुरुवात झाली आहे.

या सामन्यात ऑस्ट्रेलियाने नाणेफेक जिंकली असून प्रथम फलंदाजी करण्याचा निर्णय घेतला आहे. नाणेफेकीपूर्वी दोन्ही संघाचे कर्णधार रोहित शर्मा आणि स्टीव्ह स्मिथ यांची पंतप्रधांनांनी भेट घेतली. त्यानंतर मोदी आणि अल्बानीज यांनी मैदानाला गोल फेरी मारली. यानंतर ही नाणेफेक पार पडली.

भारतीय संघात एक बदल

या सामन्यासाठी भारताने प्लेइंग इलेव्हनमध्ये एक बदल केला आहे. भारतीय संघव्यवस्थापनाने या सामन्यासाठी मोहम्मद सिराजला विश्रांती दिली आहे. त्यामुळे मोहम्मद शमीने प्लेइंग इलेव्हनमध्ये पुनरागमन झाले आहे. या एका बदला व्यतिरिक्त भारताने कोणताही बदल केलेला नाही.

तसेच ऑस्ट्रेलियाने इंदूरमध्ये झालेल्या तिसऱ्या कसोटी सामन्यातील विजयी प्लेइंग इलेव्हनच या सामन्यासाठीही कायम करण्यात केली आहे. त्यामुळे इंदूर कसोटी खेळलेला ऑस्ट्रेलिया संघच या सामन्यातही खेळताना दिसेल.

दोन्ही संघांसाठी चौथा सामना महत्त्वपूर्ण

हा कसोटी सामना मालिका निकालाच्या दृष्टीने महत्त्वाचा आहे. या मालिकेत सध्या भारतीय संघ २-१ अशा फरकाने आघाडीवर आहे. त्यामुळे ऑस्ट्रेलियाला मालिकेत पराभव टाळण्यासाठी या सामन्यात विजय आवश्यक असेल. तर भारतीय संघ सामना जिंकला किंवा अनिर्णित राहिला, तरी ही मालिका भारतीय संघ जिंकेल.

पण कसोटी चॅम्पियनशीपच्या अंतिम सामन्यात पोहचण्यासाठी भारतीय संघाला या सामन्यात विजय गरजेचाच आहे.

असे आहेत दोन्ही संघांचे प्लेइंग इलेव्हन

भारतीय संघ - रोहित शर्मा (कर्णधार), शुभमन गिल, चेतेश्वर पुजारा, विराट कोहली, श्रेयस अय्यर, श्रीकर भारत (यष्टीरक्षक), रवींद्र जडेजा, अक्षर पटेल, रविचंद्रन अश्विन, मोहम्मद शमी, उमेश यादव

ऑस्ट्रेलिया संघ - ट्रॅव्हिस हेड, उस्मान ख्वाजा, मार्नस लॅब्युशेन, स्टीव्हन स्मिथ (कर्णधार), पीटर हँड्सकॉम्ब, कॅमेरॉन ग्रीन, ऍलेक्स कॅरी (यष्टीरक्षक), मिशेल स्टार्क, टॉड मर्फी, मॅथ्यू कुहनेमन, नॅथन लायन