FIFA World Cup 2026 and AFC Asian Cup Saudi Arabia 2027 Qualification India vs Kuwait:

फिफा वर्ल्डकप 2026 स्पर्धेसाठी आणि एएफशी आशियाई कप 2027 स्पर्धेसाठी चालू असलेल्या पात्रता स्पर्धेच्या दुसऱ्या फेरीत भारताने शानदार सुरुवात केली आहे. भारताने दुसऱ्या फेरीतील पहिल्या सामन्यात गुरुवारी (16 नोव्हेंबर) कुवेतविरुद्ध 1-0 असा विजय मिळवला.

त्यामुळे आता भारताच्या खात्यात तीन गुण जमा झाले असून कतार, अफगाणिस्तान आणि कुवेत यांचा समावेश असलेल्या गटात भारतीय संघ दुसऱ्या क्रमांकावर आला आहे. या गटातील अव्वल दोन संघ पुढच्या फेरीत जाणार आहेत.

गुरुवारी कुवेतमधील जाबेर अल-अहमद आंतरराष्ट्रीय स्टेडियमवर झालेल्या सामन्यात भारताकडून मनवीर सिंगने एकमेव केला. त्याने 75 व्या मिनिटाला गोल केला. या सामन्यात लल्लियांझुआला छांगटेची कामगिरीही महत्त्वाटी ठरली. त्याने डाव्या पायाने केलेल्या हालचालींसाठी कुवेकच्या डिफेन्सकडे उत्तर नव्हते.

या सामन्यात भारतीय प्रशिक्षक इगोर स्टिमॅक यांनी एक खेळी केली, त्यांनी छांगटेला सुरुवातीच्या 11 जणांमध्ये खेळवले नव्हते. त्यांनी त्याला 64 व्या मिनिटाला मैदानात उतरवले. ही चाल यशस्वी ठरली. त्याने कुवेतचा डिफेन्स भेदला. ज्यामुळे मनवीरला गोलची संधी मिळाली.

त्याआधी भारतीय संघाने अनेकदा कुवेतचा डिफेन्स भेदण्याचा प्रयत्न केला होता, पण भारतीय खेळाडूंना गोल करण्यात अपयश येत होते.

दरम्यान काही महिन्यांपूर्वीच भारताने कुवेतला पेनल्टी शुटआऊटमध्ये मात देत SAFF चॅम्पियनशीप जिंकली होती.

दरम्यान आता भारतीय संघ दुसऱ्या फेरीतील दुसरा सामना बलाढ्य कतारविरुद्ध खेळेल. हा सामना भुवनेश्वरला होणार आहे. कतारने अफगाणिस्तानला 8-1 अशा फरकाने पराभूत करत गटात अव्वल क्रमांक मिळवलेला आहे. दरम्यान, आता जर भारतीय संघाने पुढच्या फेरीत प्रवेश केला, तर पहिल्यांदाच भारतीय संघ फिफा वर्ल्डकप पात्रतेच्या तिसऱ्या फेरीत खेळताना दिसेल.