T20 विश्वचषकानंतर भारत आणि न्यूझीलंड यांच्यात शुक्रवारपासून T20 मालिका सुरू होत आहे. वेलिंग्टन येथे उभय संघात पहिला T20 आंतरराष्ट्रीय सामना खेळला जाणार आहे. या सामन्यासाठी भारतीय संघाचे नेतृत्व हार्दिक पांड्याकडे दण्यात आले आहे. उभय देशांतील पहिला T20 सामना भारतीय वेळेनुसार दुपारी 12.00 वाजता खेळवला जाणार आहे. दरम्यान, या सामन्यापूर्वी भारतीय संघात मोठे बदल होण्याची शक्यता आहे.

भारत आणि न्यूझीलंड यांच्यात होणाऱ्या पहिल्या T20 सामन्यात ऋषभ पंत आणि शुभमन गिल डावाची सुरूवात करू शकतात. भारतीय संघ व्यवस्थापन ऋषभ पंतला सलामीला संधी देऊ शकतात. चार वर्षांपूर्वी न्यूझीलंडमध्ये झालेल्या अंडर-19 विश्वचषकात चमकदार कामगिरी केलेला शुभमन गिल वेलिंग्टनमध्ये टी-20 पदार्पण करण्याची शक्यता आहे.

तसेच, इशान किशनला मागील काही दिवस टॉप ऑर्डरमध्ये संधी देण्यात आली होती. या मालिकेत देखील त्याला सलामीवीर म्हणून संधी दिली जाऊ शकते. याशिवाय संजू सॅमसनला आणखी एक संधी देण्यात आली असून, मालिकेत तो चमकदार कामगिरी करण्यासाठी सज्ज आहे. वॉशिंग्टन सुंदरचेही संघात पुनरागमन होणार असून त्याच्याकडूनही फलंदाजी आणि गोलंदाजीत चांगल्या कामगिरीची अपेक्षा आहे.

न्यूझीलंड मालिकेत कुलदीप यादव आणि युझवेंद्र चहल यांना एकत्र गोलंदाजी करण्याची संधी मिळू शकते. तसेच, उमरान मलिक देखील उत्कृष्ट कामगिरीसाठी सज्ज आहे.