India and Japan 1-1 draw in Men's Asian Champions Trophy Chennai 2023 Hockey: आशिया चॅम्पियन्स ट्रॉफी 2023 हॉकी स्पर्धा चेन्नईत सुरू आहे. या स्पर्धेत गुरुवारी भारतीय संघाने 7-2 अशा गोलफरकाने पराभूत करत मोहिमेला दणक्यात सुरुवात केली होती. त्यानंतर शुक्रवारी मात्र भारतीय हॉकी संघाला जपानविरुद्ध 1-1 अशा बरोबरीसह समाधान मानावे लागले.

चेन्नईतील मेयर राधाकृष्णन हॉकी स्टेडियमवर झालेल्या या सामन्यात भारताकडून हरमनप्रीत सिंगने, तर जपानकडून केन नागायोशीने गोल केला.

पहिल्या क्वार्टरमध्ये जपानने भारतावर दबाव ठेवण्यात यश मिळवले होते. पण भारतानेही सलग पेनल्टी कॉर्नर मिळवत चांगला प्रतिकार केला होता. या क्वार्टरमध्ये कोणालाही गोल करता आला नाही.

दुसऱ्या क्वार्टरमध्ये सुरुवातीला भारताला दोन चांगल्या संधी मिळाल्या होत्या. पण आकाशदीप सिंग आणि गुरजंत यांना गोल करण्यात यश आले नाही. तसेच सुमितनेही एक संधी मिळवले होती. मात्र योशिकावाने चांगला बचाव करत गोल वाचवला.

अखेर दुसरा क्वार्टर संपण्यासाठी 2 मिनिट राहिलेले असतानाच सामन्याच्या 28 व्या मिनिटाला भारताने जपानला पेनल्टी कॉर्नर दिला, ज्यावर जपानकडून नागायोशिने गोल करण्यात यश मिळवले. याबरोबर जपानने 1-0 अशी आघाडीही घेतली. जपानने अखेरच्या मिनिटालाही गोल करण्याचा प्रयत्न केला, पण कृष्णन पाठकने चांगला बचाव केला.

तिसऱ्या क्वार्टरमध्ये भारतीय संघाने पुनरागमन करण्याता प्रयत्न केला. सामन्याच्या 43 व्या मिनिटाला हार्दिक सिंगच्या प्रयत्नामुळे भारताला पेनल्टी कॉर्नर मिळाला, ज्याचा फायदा लयीत असलेल्या हरमनप्रीतने घेतला.

त्याने शानदार फ्लिकसह गोल नोंदवला. त्यामुळे त्याने भारताला 1-1 अशी बरोबरी साधून दिली. यानंतर मात्र, दोन्ही संघांना गोल करता आला नाही. त्यामुळे सामना बरोबरीत सुटला.

याबरोबरीमुळे भारतीय संघ गुणतालिकेत मलेशियाच्या खाली 4 गुणांसह दुसऱ्या क्रमांकावर आहे. आता भारताचा तिसरा सामना मलेशियाविरुद्ध 6 ऑगस्टला होणार आहे.