ICC ODI Cricket World Cup 2023, India vs New Zealand, Rohit Sharma Sixes Record:

रविवारी भारत विरुद्ध न्यूझीलंड संघात वनडे वर्ल्डकपमधील सामना पार पडला. धरमशाला येथे पार पडलेल्या या सामन्यात भारताने 4 विकेट्सने रोमांचक विजय मिळवला. या सामन्यादरम्यान भारताचा कर्णधार रोहित शर्मानेही खास विक्रमांना गवसणी घातली आहे.

या सामन्यात न्यूझीलंडने भारतासमोर 274 धावांचे आव्हान ठेवले होते. या आव्हानाचा पाठलाग करताना भारताला रोहितने शुभमन गिलच्या साथीने चांगली सुरुवात दिली होती. त्याने या सामन्यात 46 धावा केल्या. ही खेळी त्याने 40 चेंडूत 4 चौकार आणि 4 षटकारांसह केली.

त्यामुळे रोहितने वनडे क्रिकेटमध्ये 2023 वर्षात 50 षटकार मारण्याचा टप्पा पार केला आहे. तो एका वर्षात वनडे क्रिकेटमध्ये 50 षटकार मारणारा जगातील तिसरा, तर भारताचा पहिलाच क्रिकेटपटू ठरला आहे. रोहितच्या आता 2023 वर्षात 21 सामन्यांमध्ये 53 षटकार झाले आहेत.

त्याच्याआधी वनडेत एका वर्षात 50 हून अधिक षटकार ख्रिस गेल आणि एबी डिविलियर्स यांनी केला आहे. गेलने 2019 वर्षात 56 षटकार मारले होते, तर एबी डिविलियर्सने 2015 साली 58 षटकार मारले आहेत.

दरम्यान, आता रोहित एका वर्षात वनडेत सर्वाधिक षटकार मारणारा क्रिकेटपटू होण्यासाठी अवघ्या 6 षटकारांची गरज आहे. त्याने 6 षटकार यावर्षी मारले, तर तो डिविलियर्सला मागे टाकेल.

वर्ल्डकपमध्ये डिविलियर्सला टाकले मागे

वनडे वर्ल्डकपमध्ये मात्र सर्वाधिक षटकार मारणाऱ्या फलंदाजांच्या यादीत रोहितने डिविलियर्सला मागे टाकत दुसरा क्रमांक मिळवला आहे. रोहितचे आता वनडे वर्ल्डकपच्या इतिहासात 40 षटकार झाले आहेत. त्यामुळे त्याने डिविलियर्सच्या 37 षटकारांच्या विक्रमाला मागे टाकले आहे.

वनडे वर्ल्डकपमध्ये सर्वाधिक षटकार मारणाऱ्या फलंदाजांच्या यादीत अव्वल क्रमांकावर 49 षटकारांसह ख्रिस गेल आहे.

• वनडे वर्ल्डकपमध्ये सर्वाधिक षटकार मारणारे फलंदाज

  • 49 षटकार - ख्रिस गेल

  • 40 षटकार - रोहित शर्मा

  • 37 षटकार - एबी डिविलियर्स

  • 31 षटकार - रिकी पाँटिंग

  • 29 षटकार - ब्रेंडन मॅक्युलम

दरम्यान, रविवारी झालेल्या सामन्याबद्दल सांगायचे झाले, तर भारताने न्यूझीलंडने दिलेले 274 धावांचे आव्हान 48 षटकात 6 विकेट्स गमावत पूर्ण केले.