ICC ODI Cricket World Cup 2023 Final, India vs Australia, Playing XI:

भारत आणि ऑस्ट्रेलिया संघात वनडे वर्ल्डकप 2023 स्पर्धेचा अंतिम सामना रविवारी (19 नोव्हेंबर) होत आहे. हा सामना अहमदाबादमधील नरेंद्र मोदी स्टेडियमवर होत आहे. या सामन्यात ऑस्ट्रेलिया संघाने नाणेफेक जिंकली असून प्रथम गोलंदाजी करण्याचा निर्णय घेतला आहे.

दरम्यान, भारतीय संघाचा कर्णधार रोहित शर्माने नाणेफेक गमावल्यानंतर म्हटले आहे की भारतीय संघाला प्रथम फलंदाजी करायची होती. आता ऑस्ट्रेलियाने गोलंदाजीचा निर्णय घेतल्याने भारतीय संघ प्रथम फलंदाजीसाठीच उतरणार आहे.

या सामन्यासाठी भारत आणि ऑस्ट्रेलिया या दोन्ही संघांनी प्लेइंग इलेव्हनमध्ये बदल केलेला नाही. त्यामुळे दोन्ही संघांत उपांत्य फेरीत खेळलेले 11 खेळाडूच अंतिम सामन्यातही खेळताना दिसणार आहेत.

भारत आणि ऑस्ट्रेलिया हे दोन संघ २० वर्षांनी वर्ल्डकपच्या अंतिम सामन्यात आमने-सामने आले आहेत. यापूर्वी २००३ साली भारत आणि ऑस्ट्रेलिया संघात वर्ल्डकपचा अंतिम सामना झाला होता. त्यावेळी ऑस्ट्रेलियाने १२५ धावांनी विजय मिळवला होता.

दरम्यान, भारत चौथ्यांदा आणि ऑस्ट्रेलिया आठव्यांदा वनडे वर्ल्डकपचा अंतिम सामना खेळताना दिसणार आहे.

भारताने यापूर्वी 1983, 2003 आणि 2011 साली वर्ल्डकपचा अंतिम सामना खेळला आहे, त्यातील 1983 आणि 2011 साली विजय मिळवला आहे.

ऑस्ट्रेलियाने यापूर्वी 1975, 1987, 1996, 1999, 2003, 2007 आणि 2015 साली वर्ल्डकपचा अंतिम सामना खेळला आहे. यातील 1987, 1999, 2003, 2007 आणि 2015 साली ऑस्ट्रेलियाने वर्ल्डकप जिंकला आहे.

अशी आहे प्लेइंग इलेव्हन -

• भारत - रोहित शर्मा (कर्णधार), शुभमन गिल, विराट कोहली, श्रेयस अय्यर, केएल राहुल (यष्टीरक्षक), सूर्यकुमार यादव, रवींद्र जडेजा, मोहम्मद शमी, जसप्रीत बुमराह, कुलदीप यादव, मोहम्मद सिराज

• ऑस्ट्रेलिया - ट्रॅव्हिस हेड, डेव्हिड वॉर्नर, मिचेल मार्श, स्टीव्हन स्मिथ, मार्नस लॅबुशेन, ग्लेन मॅक्सवेल, जोश इंग्लिस (यष्टीरक्षक), मिचेल स्टार्क, पॅट कमिन्स (कर्णधार), ऍडम झम्पा, जोश हेझलवुड