ICC Rule for Transgender Players: आयसीसीने (ICC) ट्रान्सजेंडर खेळाडूंबाबत मोठा निर्णय घेतला आहे. ICC ने मंगळवारी ट्रान्सजेंडर खेळाडूंना आणि ज्यांनी लिंग परिवर्ताबाबत उपचार घेतले आहेत, त्यांना आंतरराष्ट्रीय महिला क्रिकेटमध्ये भाग घेण्याची परवानगी न देण्याचा निर्णय घेतला आहे.

आंतरराष्ट्रीय खेळासाठी लिंग बदलाबाबत नवीन नियमांना आयसीसी बोर्डाने मान्यता दिल्यानंतर आता कोणताही पुरुष खेळाडू लिंग बदलून महिला क्रिकेट (Cricket) संघात खेळू शकणार नाही. 9 महिन्यांच्या प्रदिर्घ चर्चेनंतर हा निर्णय घेण्यात आला आहे.

ट्रान्सजेंडर खेळाडूंवर बंदी का घालण्यात आली?

आंतरराष्ट्रीय महिला क्रिकेटची अखंडता आणि खेळाडूंच्या सुरक्षेसाठी हा निर्णय घेत असल्याचे आयसीसीने म्हटले आहे. क्रिकेटच्या अखंडतेचे रक्षण करण्यासाठी ICC ने ट्रान्सजेंडर क्रिकेटपटूंवर ही बंदी घातली. डॉ. पीटर हार्कोर्ट यांच्या अध्यक्षतेखालील आयसीसी वैद्यकीय सल्लागार समितीने हा निर्णय घेतला आहे.

आयसीसीने मंगळवारी एक प्रेस नोट जारी करताना ही माहिती दिली आहे. आयसीसीने सांगितले की, या नियमांचे दोन वर्षांत पुनरावलोकन केले जाईल. अशा परिस्थितीत, आता स्पष्टपणे सांगायचे तर, जे खेळाडू पूर्वी लिंग बदलून क्रिकेट संघाचा भाग बनले होते, ते आता असे करु शकणार नाहीत. आयसीसीच्या या नियमाने सर्वांनाच आश्चर्याचा धक्का बसला आहे. आता आयसीसीच्या या नियमाचे काय परिणाम होतात हे पाहायचे आहे.