जागतिक हॉकी चाहत्यांसाठी एक अत्यंत आनंदाची आणि उत्कंठावर्धक बातमी समोर आली आहे. आंतरराष्ट्रीय हॉकी महासंघाने (FIH) बुधवारी, १८ मार्च रोजी महिला आणि पुरुष हॉकी विश्वचषक २०२६ चे अधिकृत वेळापत्रक जाहीर केले आहे. विशेष म्हणजे, यंदा दोन्ही गटांचे विश्वचषक एकाच वेळी १५ ते ३० ऑगस्ट दरम्यान नेदरलँड्स आणि बेल्जियममध्ये खेळवले जाणार आहेत. या स्पर्धेत भारत आणि पाकिस्तानसह एकूण ११ देशांनी दोन्ही श्रेणींमध्ये आपले स्थान निश्चित केले असून हॉकीच्या या महाकुंभाकडे संपूर्ण जगाचे लक्ष लागले आहे.

भारतीय पुरुषांची पहिली लढत वेल्सविरुद्ध, 'या' दिवशी होणार हाय-व्होल्टेज राडा

भारतीय पुरुष संघाच्या मोहिमेची सुरुवात १५ ऑगस्ट रोजी वेल्सविरुद्धच्या सामन्याने होणार आहे. भारतीय चाहत्यांसाठी सर्वात मोठा आकर्षण केंद्र ठरणारा सामना म्हणजे भारत विरुद्ध पाकिस्तान. १९ ऑगस्ट रोजी एम्स्टेलवीन येथील ऐतिहासिक वैगेनर हॉकी स्टेडियमवर हे दोन पारंपारिक प्रतिस्पर्धी आमनेसामने येतील.

या हाय-व्होल्टेज सामन्यापूर्वी भारत १७ ऑगस्टला इंग्लंडशी भिडणार आहे. विशेष म्हणजे, ग्रुप स्टेजमधील भारताचे सर्व सामने भारतीय वेळेनुसार संध्याकाळी ६:३० वाजता सुरू होणार आहेत, ज्यामुळे चाहत्यांना प्राइम टाइममध्ये खेळाचा आनंद घेता येईल.

महिला संघासमोर चीनचे आव्हान

भारतीय महिला हॉकी संघ देखील या विश्वचषकात आपली छाप पाडण्यासाठी सज्ज झाला आहे. महिला संघाचा पहिला सामना १६ ऑगस्ट रोजी चीनविरुद्ध होणार आहे. त्यानंतर १८ ऑगस्टला दक्षिण आफ्रिकेविरुद्ध आणि २० ऑगस्टला इंग्लंडविरुद्ध भारतीय रणरागिणी मैदानात उतरतील. या स्पर्धेचे उद्घाटन १५ ऑगस्ट रोजी ऑस्ट्रेलिया आणि जपान या महिला संघांच्या सामन्याने होणार आहे. ३० ऑगस्ट रोजी रंगणाऱ्या अंतिम सामन्याने या स्पर्धेची सांगता होईल.