पणजी: गोव्याची (Goa) अनुभवी अष्टपैलू क्रिकेटपटू शिखा पांडे हिची आगामी सीनियर महिला चॅलेंजर क्रिकेट (Cricket) स्पर्धेसाठी भारत ‘क’ संघाच्या कर्णधारपदी निवड झाली. या स्पर्धेसाठी गोव्याची (Goa Sports) संजुला नाईक हिलाही संधी मिळाली असून तिचा ‘ड’ संघात समावेश आहे.

भारतीय क्रिकेट नियामक मंडळाने (बीसीसीआय) चॅलेंजर एकदिवसीय क्रिकेट स्पर्धेसाठी चार संघांची शनिवारी घोषणा केली. स्पर्धा साखळी फेरी पद्धतीने 4 ते 9 डिसेंबर या कालावधीत आंध्र प्रदेशमधील विजयवाडा येथे खेळली जाईल.

महिला चॅलेंजर स्पर्धेसाठी गोव्याच्या दोघा खेळाडूंची एकावेळी निवड होण्याची ही पहिलीच वेळ आहे. शिखालाही प्रथमच नेतृत्वाची संधी लाभत आहे. या महिन्यात विशाखापट्टणम-विझियानगरम येथे झालेल्या सीनियर महिला एकदिवसीय क्रिकेट स्पर्धेत गोव्याने एलिट ड गटात शानदार कामगिरी बजावली होती. शिखाच्या नेतृत्वाखाली गोव्याने उपउपांत्यपूर्व फेरीपर्यंत मजल मारली होती. बाद फेरीत गोव्याला पंजाबविरुद्ध हार पत्करावी लागली. त्या लढतीत शिखाने 49 व संजुलाने 40 धावा करून राष्ट्रीय निवड समितीचे लक्ष वेधून घेतले. संजुलाला दीर्घ कालावधीनंतर चॅलेंजर स्पर्धेसाठी संधी मिळाली आहे. यापूर्वी ती 19 वर्षांखालील वयोगटातील चॅलेंजर स्पर्धेत खेळली होती.

शिखाची अष्टपैलू कामगिरी

शिखाने सीनियर महिला एकदिवसीय स्पर्धेत शानदार अष्टपैलू खेळ केला. तिने मध्यफळीत खेळताना 6 सामन्यातील 5 डावात 144 धावा केल्या, तसेच वेगवान गोलंदाजीने 7 विकेटही टिपल्या. 32 वर्षीय भारतीय महिला क्रिकेट संघाची सदस्य आहे. 2014 पासून तिने आंतरराष्ट्रीय कारकिर्दीत 3 कसोटींत 4 विकेट, 55 एकदिवसीय सामन्यांत 75 विकेट, तर 56 टी-20 सामन्यांत 40 विकेट घेतल्या आहेत.