पणजी ः गोवा बुद्धिबळ संघटनेच्या (Goa Chess Association) आगामी निवडणुकीसाठी सात तालुक्यांचा (जी-7) गट एकसंध राहिल्यामुळे प्रतिस्पर्धी गट अस्वस्थ झाल्याची माहिती आहे. बाकी पाच तालुक्यातील एकाही प्रतिनिधीने शुक्रवारी उमेदवारी अर्ज सादर केला नाही. येत्या 22 ऑगस्टला नियोजित असलेल्या निवडणुकीसाठी पाच ऑगस्टपर्यंत उमेदवारी अर्ज स्वीकारले जातील. बार्देश, डिचोली, पेडणे, सत्तरी, तिसवाडी, फोंडा, सासष्टी या सात तालुक्यातील प्रतिनिधींनी गुरुवारी एकत्रितपणे अर्ज सादर केले. आतापर्यंत एकूण 11 जणांचे अर्ज विविध पदासाठी दाखल झाले आहेत. त्यात महेश कांदोळकर, आशेष केणी, विश्वास पिळर्णकर ही प्रमुख नावे आहेत. धारबांदोडा, सांगे, केपे, काणकोण व मुरगाव या तालुक्यातील एकही अर्ज सादर झालेला नाही. गोवा बुद्धिबळ संघटनेशी एकूण 12 तालुका संघटना संलग्न आहेत. तालुका संघटनेतील प्रत्येकी दोन प्रतिनिधी निवडणुकीत भाग घेतील.

काब्राल यांच्या भूमिककडे लक्ष

प्राप्त माहितीनुसार, सध्याचे अध्यक्ष वीजमंत्री नीलेश काब्राल (Nilesh Cabral) पुन्हा निवडणूक लढविणार का याबाबत अजून स्पष्टता नाही. बुद्धिबळ निवडणूक रिंगणातील ‘जी-7’ गट काब्राल यांच्या समर्थनार्थ असलेल्या गटाच्या विरोधात आहे. सूत्राच्या माहितीनुसार, बहुमत नसल्यास काब्राल पुन्हा बुद्धिबळ संघटनेच्या निवडणूक रिंगणात उतरण्याची शक्यता फारच कमी मानली जाते.