फिफा विश्वचषक 2026 मधील बाद फेरीतील महत्त्वाच्या सामन्यात इंग्लंडचा सामना यजमान मेक्सिकोशी होणार असून, या लढतीपूर्वी इंग्लंडच्या संघाच्या तयारीची जोरदार चर्चा रंगली आहे. मैदानावरील प्रतिस्पर्ध्यांइतकेच वातावरणाशी जुळवून घेणे हे मोठे आव्हान ठरणार असल्याने संघ व्यवस्थापनाने वैज्ञानिक आणि वैद्यकीय पातळीवर विशेष नियोजन केले आहे. विशेष म्हणजे, कमी ऑक्सिजनच्या परिस्थितीचा सामना करण्यासाठी खेळाडू 'व्हायग्रा'चा वापर करू शकतात, अशी शक्यता व्यक्त केली जात असल्याने फुटबॉल विश्वाचे लक्ष या सामन्याकडे लागले आहे.

उंचीमुळे निर्माण होणार मोठे आव्हान

इंग्लंड आणि मेक्सिको यांच्यातील सामना मेक्सिको सिटीतील ऐतिहासिक स्टेडियममध्ये खेळवला जाणार आहे. हे मैदान समुद्रसपाटीपासून सुमारे 2,240 मीटर उंचीवर असल्याने खेळाडूंना कमी ऑक्सिजनचा सामना करावा लागू शकतो. अशा परिस्थितीत धावण्याची क्षमता कमी होणे, लवकर थकवा येणे किंवा चक्कर येण्यासारख्या समस्या उद्भवण्याची शक्यता असते. त्यामुळे इंग्लंडने सामन्यापूर्वीच या आव्हानाचा गांभीर्याने विचार केला आहे.

'व्हायग्रा' वापराबाबत का सुरू आहे चर्चा?

वैद्यकीय तज्ज्ञांच्या मते, काही संशोधनांमध्ये उंच प्रदेशातील रक्ताभिसरण सुधारण्यासाठी सिल्डेनाफिल (व्हायग्रा) उपयुक्त ठरू शकते, असा उल्लेख करण्यात आला आहे. त्यामुळेच कमी ऑक्सिजनच्या परिस्थितीत खेळाडूंना मदत होऊ शकते, अशी चर्चा आहे. विशेष म्हणजे, जागतिक अँटी-डोपिंग संस्था (WADA) च्या नियमांनुसार अशा वैद्यकीय वापरावर बंदी नसल्याने या विषयाने अधिकच लक्ष वेधले आहे. मात्र, संघाकडून अधिकृतपणे अशा औषधाचा वापर केला जाणार असल्याची घोषणा करण्यात आलेली नाही.

वातावरणाशी जुळवून घेण्यासाठी मर्यादित वेळ

इंग्लंडचे मुख्य प्रशिक्षक थॉमस ट्यूशेल यांनी यापूर्वीच स्पष्ट केले आहे की, संघाला मेक्सिकोच्या उंच प्रदेशातील वातावरणाशी जुळवून घेण्यासाठी फारसा वेळ मिळणार नाही. त्यामुळे प्रत्येक खेळाडूची शारीरिक क्षमता टिकवून ठेवण्यासाठी वैद्यकीय सल्ल्यानुसार विविध पर्यायांचा विचार करण्यात येत आहे. यामध्ये योग्य आहार, हायड्रेशन, रिकव्हरी आणि झोपेवर विशेष भर दिला जात आहे.

इंग्लंडने केवळ मैदानावरील तयारीच नाही, तर मैदानाबाहेरील संभाव्य अडचणींसाठीही विशेष योजना आखली आहे. यापूर्वी एका आंतरराष्ट्रीय संघाच्या खेळाडूंना स्थानिक चाहत्यांनी रात्रीभर गोंधळ घालून झोपू दिले नव्हते. हा अनुभव लक्षात घेऊन इंग्लंडच्या संघाने आपल्या हॉटेलचे ठिकाण गुप्त ठेवण्याचा निर्णय घेतल्याचे समजते. त्यामुळे खेळाडूंना पूर्ण विश्रांती मिळावी आणि सामन्यापूर्वी कोणताही व्यत्यय येऊ नये, यासाठी ही खबरदारी घेतली जात आहे.

झोपेसाठीही विशेष व्यवस्था

उच्च दाबाच्या सामन्यापूर्वी खेळाडूंची झोप पूर्ण होणे अत्यंत महत्त्वाचे मानले जाते. त्यामुळे संघ व्यवस्थापनाने खेळाडूंच्या खोल्यांमध्ये 'व्हाईट नॉईज' ऑडिओ मशीन बसवण्याची व्यवस्था केली आहे. बाहेरील आवाज कमी जाणवावा आणि शांत झोप लागावी, हा यामागील उद्देश आहे. तसेच, आवश्यकतेनुसार इअरप्लग, स्लीप बँड किंवा वैद्यकीय सल्ल्यानुसार झोपेसाठी सहाय्यक औषधांचाही पर्याय उपलब्ध ठेवण्यात आला आहे.