Mexico Vs Poland Match Draw: फिफा फुटबॉल वर्ल्डकप स्पर्धेत मंगळवारी ग्रुप सी मध्ये झालेल्या मेक्सिको विरूद्ध पोलंड सामना अनिर्णित राहिला. निर्धारीत वेळेसह भरपाई वेळेतही दोन्ही संघांना गोल करता आला नाही. दोन्ही संघांना प्रत्येकी एक गुण देण्यात आला आहे.

(FIFA World Cup 2022)

स्टेडियम 974 वर झालेल्या या सामन्यात मेक्सिकोने चेंडुवर 61 टक्के नियंत्रण राखले. मेक्सिकोची पासिंगमधील अचूकता देखील 83 टक्के होती. मेक्सिकोच्या दोन तर पोलंडच्या एका खेळाडुला यलो कार्ड दाखविण्यात आले. मेक्सिकोला 6 कॉर्नर मिळाले तर पोलंडला 5 कॉर्नर मिळाले, पण त्याचे रूपांतर गोलमध्ये करण्यात कुठल्याही संघाला यश आले नाही.

दरम्यान, ग्रुप सी मध्ये आता टॉप 16 मध्ये जाण्यासाठी चुरस असणार आहे. कारण ग्रुपमधील बलाढ्य आणि विजेतेपदाचा दावेदार समजल्या जाणाऱ्या अर्जेंटिना संघाला तुलनेने दुबळ्या सौदी अरेबिया संघाकडून पराभव स्विकारावा लागला आहे. तर मेक्सिको पोलंड सामना अनिर्णित राहिल्याने दोन्ही संघांना प्रत्येकी एक गुण मिळाला आहे. त्यामुळे या गटाच्या गुणतक्त्यात सध्या अर्जेंटिना सर्वात शेवटी आहे. सामना अनिर्णित राहिल्यास किमान एक गुण तरी मिळतो, पण पराभूत झाल्यास गुण मिळत नाहीत.