पणजी : गोव्याचा प्रतिभाशाली युवा बुद्धिबळपटू एथन वाझ याने राष्ट्रीय 12 वर्षांखालील बुद्धिबळ स्पर्धेच्या खुल्या गटात छाप पाडली. स्पर्धेत तिसऱ्या क्रमांकाचे ब्राँझपदक जिंकून त्याने आगामी आशियाई, तसेच जागतिक स्पर्धेसाठीही पात्रता मिळविली.

स्पर्धा कर्नाटकातील मंड्या येथे झाली. 10 वर्षीय एथनने 11 फेऱ्यांतून 9 गुणांची कमाई केली. मात्र विजेतेपद त्याला अवघ्या अर्ध्या गुणाने हुकले. तो संयुक्त दुसऱ्या स्थानी राहिला. मात्र टायब्रेकर गुणांत त्याला तिसरा क्रमांक मिळाला.

राष्ट्रीय बुद्धिबळ (Chess) स्पर्धेत पोडियम फिनिश मिळाल्याने एथन आता आशियाई, जागतिक स्पर्धेत भारताचे प्रतिनिधित्व करण्यास अधिकृतपणे पात्र ठरला आहे. गतवर्षी एथनने (Ethan Vaz) राष्ट्रीय 10 वर्षांखालील बुद्धिबळ स्पर्धेच्या खुल्या गटात रौप्यपदक जिंकले होते. तेव्हा कोविड महामारीमुळे स्पर्धा ऑनलाईन पद्धतीने झाली होती.

मंड्या येथे झालेल्या राष्ट्रीय स्पर्धेत गोव्याच्या (Goa) अन्य खेळाडूंत खुल्या गटात अभीर प्रभू, राजवीर पाटील यांनी प्रत्येकी साडेसहा गुण, वेदांत आंगले याने सहा, अथर्व सावळ याने साडेपाच, तर सर्वांग पागी चार गुण नोंदविले. कौटुंबिक कारणास्तव माघार घेतलेल्या ऐडेन ग्राओ याने तीन फेऱ्यांतून दीड गुण प्राप्त केले. मुलींत श्रीया पाटील हिने सात, दिया सावळने सहा, श्रीवल्ली गांधी हिने साडेपाच, जेनिसा सिक्वेरा हिने पाच, तर साईजा देसाई आणि श्रमा मोरुडकर यांनी प्रत्येकी चार गुण नोंदविले.