पणजी: धेंपो स्पोर्टस क्लबने (Dhempo Sports Club) गुरुवारी गोवा प्रोफेशनल लीग फुटबॉल (Goa Professional League) स्पर्धेत मोठा विजय नोंदविला. म्हापसा येथील धुळेर स्टेडियमवर त्यांनी यूथ क्लब मनोरा संघाचा 4-0 फरकाने धुव्वा उडविला. धेंपो क्लबच्या विजयात सूरज हडकोणकर याने दोन गोल केले, त्याने अनुक्रमे 28 व 46 व्या मिनिटास अचूक नेम साधला. पेद्रू गोन्साल्विसे (Pedro Gonsalves) 52 व्या मिनिटास गोल केल्यानंतर लतेश मांद्रेकरने 87 व्या मिनिटास गोल करून धेंपो क्लबच्या एकतर्फी विजयावर शिक्कामोर्तब केले.

सामन्यावर धेंपो क्लबने पूर्ण वर्चस्व राखले. सामना सुरू झाल्यानंतर लगेच धेंपो क्लबला आघाडीची संधी होती, परंतु क्लुसनर परेराचा फटका थोडक्यात चुकला. नंतर साईश बागकरच्या (Saish Bagkar) पासवर पेद्रू चेंडूला नेटची दिशा दाखवू शकला नाही. मात्र नंत पेद्रूच्या असिस्टवर सूरजने प्रतिस्पर्धी गोलरक्षकाला चकवून सामन्यातील पहिला गोल केला. उत्तरार्धाच्या पहिल्याच मिनिटास सूरजने मनोरा संघाच्या बचावफळीतील चुकीचा लाभ उठवत आणखी एक गोल केला. आणखी सहा मिनिटानंतर गौरवने रचलेल्या चालीवर पेद्रूने गोल नोंदविला. सामना संपण्यास तीन मिनिटे बाकी असताना रिचर्ड कार्दोझचा फटका मनोरा संघाचा गोलरक्षक व्यवस्थित अडवू शकला नाही, त्याचा लाभ उठवत लतेशने रिबाऊंडवर लक्ष्य साधले.