C. K. Naidu Trophy: कर्नल सी. के. नायडू करंडक क्रिकेट सामन्यात गोव्याला तमिळनाडूविरुद्ध रविवारी पहिल्या दिवसअखेर 8 बाद 228 धावांची मजल मारता आली. कौशल हट्टंगडी याने शानदार फलंदाजी करताना नवोदित मयूर कानडे याच्यासमवेत पाचव्या विकेटसाठी शतकी भागीदारी केली.

दरम्यान, सांगे येथील जीसीए मैदानावर तमिळनाडूने नाणेफेक जिंकून गोव्याला पहिल्यांदा फलंदाजीस पाचारण केले होते. मात्र, यजमान गोव्याच्या सुरुवातीला 48 धावसंख्येवर 4 विकेट्स पडल्या होत्या. अशा कठीण परिस्थितीत कौशल याने पहिलाच सामना खेळणाऱ्या मयूर याच्यासमवेत सावध फलंदाजी करताना गोव्याला सावरले. कौशल याला पी. विद्युत याने त्रिफळाचीत बाद केल्यामुळे पाचव्या विकेटसाठीची 129 धावांची भागीदारी भंग झाली. त्याने 197 चेंडूंत 7 चौकारांच्या मदतीने 73 धावा केल्या. आणखी दहा धावांची भर पडल्यानंतर मयूरला लक्षय जैन याने बाद केल्यामुळे गोव्याला आणखी एक धक्का बसला. मयूरने 202 चेंडूंतील खेळीत 2 चौकारांसह 41 धावा केल्या. तमिळनाडूचा ऑफस्पिनर एस. लक्षय जैन याने पाच गडी बाद केले.

संक्षिप्त धावफलक

गोवा, पहिला डाव: 90 षटकांत 8 बाद 228 (अझान थोटा 0, अभिनव तेजराणा 28, राहुल मेहता 15, कौशल हट्टंगडी 73, देवन चित्तेम 0, मयूर कानडे 41, पियुष यादव 15, मनीष काकोडे 11, लखमेश पावणे नाबाद 12, जगदीश पाटील नाबाद 1, सी. व्ही. अच्युत 1-43, जी. गोविंथ 1-20, एस. लक्षय जैन 5-73, पी. विद्युत 1-60).