पणजी : गोव्याच्या माजी विजेत्या चर्चिल ब्रदर्सच्या यावेळच्या आय-लीग फुटबॉल (Football) स्पर्धेतील मोहिमेत रविवारी पराभवाने सुरवात झाली. पश्चिम बंगालमधील कल्याणी म्युनिसिपल स्टेडियमवर गतविजेत्या गोकुळम केरळा संघाने त्यांच्यावर 1-0 फरकाने निसटता विजय प्राप्त केला.

सामन्याच्या 16व्या मिनिटास शरीफ महंमद याने पेनल्टी फटक्यावर नोंदविलेला गोल निर्णायक ठरला आणि त्यामुळे केरळच्या संघाला पूर्ण तीन गुण प्राप्त करता आले. त्यांनी गोव्यातील (goa) संघावर नोंदविलेला हा सलग दुसरा विजय ठरला. गतमोसमातील आय-लीग स्पर्धेतील दुसऱ्या टप्प्यातील त्यांनी चर्चिल ब्रदर्सला नमविले होते.

चर्चिल ब्रदर्सने गोकुळम केरळास जोरदार टक्कर दिली, पण पूर्वार्धातील पेनल्टी गोलने त्यांचा घात केला. गोकुळम केरळाच्या एन. रोनाल्ड सिंग याने चर्चिल ब्रदर्सच्या गोलक्षेत्रात जोरदार मुसंडी मारली असता, बचावपटू शादी स्काफ याने धोकादायकपणे अडथळा आणला. यावेळी रेफरीने पेनल्टी फटक्याची खूण केली, कर्णधार शरीफ महंमद याने शांतपणे अचूक फटका मारून संघाला आघाडी मिळवून दिली.

चर्चिल ब्रदर्सचा स्पर्धेतील पुढील सामना 31 डिसेंबर रोजी पंजाब (Punjab) एफसी संघाविरुद्ध होईल. गोकुळम केरळा 30 डिसेंबरला नेराका एफसी संघाविरुद्ध खेळेल. स्पर्धेतील आणखी एका सामन्यात इंडियन एरोज संघाने टिड्डिम रोड एथलेटिक युनियन (ट्राऊ) एफसी संघाला गोलशून्य बरोबरीत रोखले. सामना कोलकात्यातील मोहन बागान मैदानावर झाला.