Bangladesh won 1st Test by 150 runs against New Zealand at Sylhet:

बांगलादेशने शनिवारी मोठा पराक्रम केला आहे. बांगलादेशने न्यूझीलंडला सिल्हेट आंतरराष्ट्रीय क्रिकेट स्टेडियमवर झालेल्या कसोटी मालिकेतील पहिल्या सामन्यात पराभवाचा धक्का दिला आहे. बांगलादेशने 150 धावांनी हा कसोटी सामना जिंकत 2 सामन्यांच्या कसोटी मालिकेत 1-0 अशी आघाडी घेतली आहे.

बांगलादेशच्या या विजयाचा हिरो तैजुल इस्लाम ठरला आहे. त्याने या सामन्यात १० विकेट्स घेतल्या. याशिवाय नजमुल हुसैन शांतोसाठी हा कर्णधार म्हणून पहिला सामना होता, त्यामुळे त्याच्या नेतृत्वाची सुरुवातही विजयाने झाली. दरम्यान, बांगलादेशचा हा मायदेशात न्यूझीलंडविरुद्ध मिळवलेला पहिलाच विजय ठरला आहे.

या सामन्याला 28 नोव्हेंबर रोजी सुरुवात झाली होती. बांगलादेशने दुसऱ्या डावात न्यूझीलंडसमोर 332 धावांचे आव्हान ठेवले होते. या आव्हानाचा पाठलाग करताना न्यूझीलंडचा दुसरा डाव सामन्याच्या पाचव्या दिवशी 71.1 षटकात 181 धावांवर संपुष्टात आला. त्यामुळे बांगलादेशने विजयावर शिक्कामोर्तब केले.

न्यूझीलंडकडून दुसऱ्या डावात डॅरिल मिचेलने सर्वाधिक 58 धावा केल्या. तसेच टीम साऊदीनेही 34 धावांची झुंज दिली. मात्र बाकी कोणाला खास काही करता आले नाही. तैजुल इस्लामने न्यूझीलंडच्या फलंदाजांना धावा करण्यासाठी संघर्ष करावा लागला. त्याने केन विलियम्सन (11), डेवॉन कॉनवे (22) यांच्या महत्त्वाच्या विकेट्सही घेतल्या.

या डावात तैजुलने 75 धावा देत 6 विकेट्स घेतल्या. त्याच्याव्यतिरिक्त नाईम हसनने 2 विकेट्स घेतल्या, तर शोरिफूल इस्लाम आणि मेहदी हसन मिराज यांनी प्रत्येकी 1 विकेट घेतली.

तत्पुर्वी या सामन्यात बांगलादेशने नाणेफेक जिंकून प्रथम फलंदाजी करण्याचा निर्णय घेतला होता. त्यामुळे बांगलादेश प्रथम फलंदाजीसाठी उतरले. बांगलादेशने पहिल्या डावात 85.1 षटकात सर्वबाद 310 धावा केल्या.

बांगलादेशकडून मेहमुदुल हसन जॉयने 86 धावांची खेळी केली. तसेच नजमुल हुसैन शांतो आणि मोमिनूल हक यांनी प्रत्येकी 37 धावांची खेळी केली. याशिवाय अन्य फलंदाजांनी छोटेखानी खेळी करत धावसंख्येत भर टाकली. न्यूझीलंडकडून ग्लेन फिलिप्सने सर्वाधिक 4 विकेट्स घेतल्या.

त्यानंतर न्यूझीलंडने पहिल्या डावात 101.5 षटकात सर्वबाद 317 धावा केल्या आणि 7 धावांची आघाडी मिळवली. या डावात न्यूझीलंडकडून केन विलियम्सनने 104 धावांची शतकी खेळी केली. तसेच डॅरिल मिचेलने 41 धावांची आणि ग्लेन फिलिप्सने 42 धावांची खेळी केली.याशिवाय कर्णधार टीम साऊदीने 35 धावा केल्या. बांगलादेशकडून तैजुलने 4 विकेट्स घेतल्या.

यानंतर दुसऱ्या डावात फलंदाजी करताना बांगलादेशने 100.4 षटकात 338 धावा उभारल्या. दरम्यान, पहिल्या डावातील 7 धावांच्या पिछाडीमुळे बांगलादेशने न्यूझीलंडसमोर 332 धावांचे आव्हान ठेवले होते.

दरम्यान, बांगलादेशकडून दुसऱ्या डावात कर्णधार शांतोने 105 धावांची शतकी खेळी केली. तसेच मुशफिकूर रहिमने 67 धावांची, मेहदी हसन मिराजने 50 धावांची अर्धशतकी खेळी केली, तर मोमीनुल हकने 40 धावांची खेळी केली. न्यूझीलंडकडून या डावात एजाज पटेलने सर्वाधिक 4 विकेट्स घेतल्या.