Asia Cup 2022 Updates: प्रदीर्घ प्रतिक्षेनंतर, आशिया कपचे संपूर्ण वेळापत्रक समोर आले आहे. 27 ऑगस्टपासून या स्पर्धेला सुरुवात होणार असून अंतिम सामना 11 सप्टेंबरला होणार आहे. येथे भारत-पाकिस्तान (IND vs PAK) एकाच गटात आहेत आणि ते 28 ऑगस्ट रोजी संध्याकाळी 6 वाजता मैदानावर उतरणार आहेत. आशिया कपचे आयोजन संयुक्त अरब अमिराती (UAE) मध्ये होत आहे. आशिया कपमध्ये दोन गट करण्यात आले आहेत. प्रत्येक गटात तीन संघ असतील. अ गटात भारत-पाकिस्तानसह आणखी एक पात्रता संघ असेल. तसेच अफगाणिस्तानचा संघ श्रीलंका आणि बांगलादेशसह ब गटात ठेवण्यात आला आहे.

वेळापत्रकानुसार भारत 28 ऑगस्टपासून पाकिस्तानविरुद्धच्या मोहिमेला सुरुवात करणार आहे. यानंतर भारताचा दुसरा सामना 31 ऑगस्टला होणार आहे. यानंतर 3 सप्टेंबरपासून सुपर-4 फेरीत 6 सामने खेळवले जातील. 11 सप्टेंबर रोजी अव्वल दोन संघ अंतिम फेरीत भिडतील.

बीसीसीआयचे सचिव जय शाह यांनी त्यांच्या ट्विटर हँडलवरून आशिया कपचे वेळापत्रक शेअर केले. त्यांनी लिहिले की, 'प्रतीक्षा अखेर संपली कारण आशियाई वर्चस्वाची स्पर्धा 27 ऑगस्टपासून सुरू होत आहे. अंतिम सामना 11 सप्टेंबर रोजी होणार आहे. आशिया चषक स्पर्धेची ही 15 वी आवृत्ती टी-20 विश्वचषकापूर्वी महत्त्वाची तयारी म्हणून कामगिरी बजावणार आहे. 2022 मध्ये पहिला आशिया कप श्रीलंकेत होणार होता. मात्र गेल्या काही आठवड्यांपासून तेथे सुरू असलेल्या अस्थिरतेमुळे ते यूएईला हलवण्यात आले आहे. असे असले तरी सामन्यांच्या तारखेत कोणताही बदल करण्यात आलेला नाही.