महाराष्ट्राचा कर्णधार ऋतुराज गायकवाड सध्या दमदार फॉर्ममध्ये आहे. त्याने 28 नोव्हेंबर रोजी विजय हजारे ट्रॉफी 2022 स्पर्धेच्या उपांत्यपूर्व सामन्यात उत्तर प्रदेशविरुद्ध 220 धावांची विक्रमी द्विशतकी खेळी केली होती. या खेळीदरम्यान त्याने सलग 7 षटकार मारण्याचाही पराक्रम नोंदवला. या खेळीबद्दल ऋतुराजने आपल्या भावना बीसीसीआयशी बोलताना व्यक्त केल्या आहेत.

ऋतुराजने महाराष्ट्राच्या डावातील 49 व्या षटकात एका नो बॉलवरील षटकारासह सलग 7 षटकार मारत 42 धावा केल्या होत्या. या खेळी दरम्यान त्याला युवराज सिंगच्या 6 षटकारांची आठवण झाल्याचे त्याने मान्य केले आहे. युवराजने (Yuvraj Singh) 2007 टी20 वर्ल्डकपमध्ये इंग्लंडविरुद्ध एका षटकात सलग 6 षटकार मारले होते.

ऋतुराज (Ruturaj Gaikwad) म्हणाला, 'खरं सांगायचं तर पाचवा षटकार मारल्यानंतर माझ्या डोक्यात फक्त एका व्यक्तीचा विचार येऊन गेला, तो व्यक्ती म्हणजे युवराज सिंग. मी लहान असताना त्याला 2007 टी20 वर्ल्डकपमध्ये एका षटकार 6 षटकार मारताना पाहिले होते.'

'मला त्याच्या पंक्तीत बसायचे होते. त्याचमुळे मी सहावा षटकारही मारला. मी कधीही विचार केला नव्हता, अगदी स्वप्नातही की मी सलग सहा षटकार मारू शकतो. युवराजच्या पंक्तीत बसण्याचा आनंद खूप मस्त आहे.'

ऋतुराज पुढे म्हणाला, 'जेव्हा मी सहावा षटकार मारला, तेव्हा विचार केला की सातव्या षटकारासाठीही जायला हवं. त्या षटकात आणि संघासाठी शक्य तेवढे जास्त धावा करण्याचा प्रयत्न होता. ही एक मूळ योजना होती आणि मला आनंद आहे की ती पूर्ण झाली.'

याबरोबरच ऋतुराजने ही खेळी संघसहकारी, कुटुंब आणि महाराष्ट्रातील लोकांना समर्पित केली आहे.

ऋतुराज हा लिस्ट ए क्रिकेटमध्ये सलग 7 षटकार मारणारा पहिला क्रिकेटपटू आहे. तसेच लिस्ट ए क्रिकेटमध्ये द्विशतक करणारा महाराष्ट्र संघातील पहिला खेळाडू आहे.