दरवर्षी जगभरात 15 मे हा दिवस 'आंतरराष्ट्रीय कुटुंब दिन' म्हणून साजरा केला जातो. कुटुंबाचे महत्त्व सांगणारा हा दिवस सर्वत्र लोक आनंदाने साजरा करतात. सध्याच्या धावपळीच्या काळात कुटुंबाचे महत्त्व अजूनच वाढले आहे. समाजाची कल्पना कुटुंबाशिवाय अपूर्ण आहे. कुटुंबामुळे आपण समाजातील इतर व्यक्तींशी जोडले जातो. कुटुंब (Family) फक्त आपले नातेचं सुधारत नाही तर ते आपल्याला प्रत्येक सुख दुःखात साथ देखील देते. त्यामुळे प्रत्येकाच्या आयुष्यात कुटुंबाचे महत्त्वाचे स्थान आहे. आजच्या आधुनिक काळातही त्याचे महत्त्व थोडे सुद्धा कमी झाले नाही. (International Family Day 2022 News)

परंतु, आपापसातील मदभेदांमुळे आधुनिक काळातील कुटुंब खूप लवकर एकमेकांपासून लांब जाऊ लागले आहेत. अशावेळी कुटुंबाचे खास महत्त्व सांगणारा दिवस म्हणून 'आंतरराष्ट्रीय कुटुंब दिवस' साजरा केला जातो. आजकाल जॉबमुळे (Job) अनेक लोकांना स्वतःच्या कुटुंबांपासून दूर रहावं लागतं. त्यामुळेच अनेक कुटुंब विस्कळीत होऊ लागले आहेत. खरंतर आंतरराष्ट्रीय कुटुंब दिवस साजरा करण्याचा मूळ उद्देश आजच्या तरूण पिढीला एकत्र कुटुंबाचे महत्त्व समजावे हा आहे.

संयुक्त राष्ट्रांनी 1980 च्या दशकात कुटुंबाशी संबंधित समस्यांवर लक्ष केंद्रित करण्यास सुरुवात केली. 1983 मध्ये, आर्थिक आणि सामाजिक परिषद, सामाजिक विकास आयोगाने, विकास प्रक्रियेत कुटुंबाच्या भूमिकेवर ठरावाची शिफारस केली. त्यानुसार15 मे हा दिन साजरा केला जाऊ लागला.कुटुंबाचे महत्व, प्रत्येक कुटुंबाविषयी प्रेम, आदर वाढविण्यासाठी हा दिन साजरा केला जातो.