मडगाव: राज्यातील महिलांच्या मनात डोकावून त्यांच्या कल्पनेतला गोवा (Goa) साकारण्यासाठी व्यासपीठ मिळवून देण्याचा उद्देश ठेवून दै. ‘गोमन्तक’ने (Dainik Gomantak) हाती घेतलेल्या जनमन उत्सव सर्वेक्षण आजपासून कुठ्ठाळी मतदारसंघात सुरू झाले. सांकवाळ येथील महिलांनी त्यात उत्साहाने भाग घेतला. सांकवाळ येथील स्त्रीशक्ती स्वयंसेवा महिला गटातील सदस्यांनी या उपक्रमात सहभागी होत आपली मते नोंद केली. यावेळी त्यांच्यामध्ये उत्साहाचे वातावरण होते. याशिवाय मुरगाव (Murgaon) मतदारसंघात बायणा भागातही सर्वेक्षण करण्यात आले.

कुडतरी मतदारसंघात आज (सोमवारी) पाचभाट या भागात तर केपे मतदारसंघात खड्डे या ग्रामीण भागात जाऊन महिलांची मते आजमावण्यात आली. सुबदळे येथील महिलांनीही या सर्वेक्षणात भाग घेतला. या सर्वेक्षणाद्वारे गोमतंक गोव्यातील ३ लाख महिलांपर्यंत जाऊन त्यांची मते जाणून घेणार असून, गोव्यातील महिलांच्या स्वप्नातील गोवा साकार करण्याचा प्रयत्न करणार आहेत.