सर्वांचा आवडता आणि देशातील सर्वात मोठा सार्वजनिक सण दिवाळी काही दिवसांवर येऊन ठेपली आहे. दिवाळीत सर्वत्र उत्साह आणि आनंदाचे वातारवण असते. या सणासुदीच्या काळात एकमेकांना भेटवस्तू दिल्या जातात. भेटवस्तू नाती मजबूत करण्यासाठी आणि प्रेम व्यक्त करण्याचा एक उत्तम मार्ग आहे. पण, भेटवस्तूबाबत वास्तूशास्त्रात काही नियम सांगण्यात आले आहेत.

वास्तूशास्त्रानुसार अशा अनेक गोष्टी आहेत ज्या कधीही कोणालाही भेट म्हणून देऊ किंवा घेऊ नयेत. अशा गोष्टी दिल्याने आयुष्यात सुखाऐवजी संकटेच येऊ शकतात. चला तर मग जाणून घेऊयात अशा कोणकोणत्या वस्तू आहेत ज्या कधीही कोणाला भेट देऊ नयेत.

हिंसक प्राण्याचे चित्र

हिंसक प्राण्याचे चित्र कधीही भेटवस्तू म्हणून देऊ नये. उदा. वाघ, सिंह अशा प्राण्यांचे चित्र भेट म्हणून देणे शुभ मानले जात नाही. अशा चित्रांमुळे घरात अशांतता संकटे येतात आणि शांतता भंग पावते. तसेच, तीक्ष्ण वस्तू कधीही गिफ्टमध्ये देऊ नये, यामुळे तुमच्या नात्यात दुरावा निर्माण होऊ शकतो.

भेट म्हणून रुमाल देऊ नका

वास्तूशास्त्रानुसार, भेट म्हणून रुमाल कधीही देऊ नये. यामुळे नात्यात दुरावा निर्माण होऊ शकतो.

निसर्ग चित्रे

वास्तुशास्त्रानुसार निसर्गाशी संबंधित चित्रे भेट म्हणून देऊ नयेत. विशेषतः वाळवंट, सुकलेली झाडे, बुडणारी जहाजे, बुडता चेहरा अशी छायाचित्रे कोणालाही देऊ नयेत किंवा कुणाकडून घेऊ नयेत. अशा प्रकारच्या भेटवस्तूमुळे घरात अनेक समस्या निर्माण होतात.

घड्याळ

वास्तूनुसार घड्याळ कोणालाही भेट म्हणून देऊ नये. अनेकदा लग्नसमारंभात किंवा वाढदिवसाला भेट म्हणून घड्याळ दिले जाते. पण, घड्याळ भेट म्हणून देणे शुभ मानले जात नाही. घड्याळ भेट म्हणून दिल्याने आयुष्यात अनेक अडथळे निर्माण होऊ शकतात.