Amla Maramba: शरीरासाठी सर्वात आरोग्यवर्धक ठरणारा पदार्थ म्हणजे आवळा. पण आवळा चवीला अंबट, तुरट लागत असल्यामुळे अनेक लोकांना आवळा खायला आवडत नाही. रोगप्रतिकार शक्ती वाढवणारा आवळा हिवाळ्याच्या दिवसात खाणे शरीरासाठी खूप पोषक ठरते. अनेक लोकं आवळ्याचा नाव काढलं तरी तोंड पाडतात. अशा सर्वांसाठी आपण आवळ्याचा मुरांबा कसा बनवायचा? हे जाणून घेणार आहोत.

आवळ्यात असणाऱ्या व्हिटॅमिन-सीमुळे आपली इम्युनिटी स्ट्रॉंग होते. तसेच यात ॲण्टी ऑक्सिडंट्सचे गुण असल्याने अनेक संसर्गांपासून आपले संरक्षण होते. हे सगळे फायदे शरीराला होण्यासाठी आवळ्याचा मुरांबा बनवून खाऊ शकता. हा मुरांबा तुम्ही चपातीसोबत अथवा तसाच खाऊ शकता. थंडीच्या दिवसांत आवळ्याच्या मुरांब्याची टेस्ट लहानांपासून मोठ्यांपर्यंत सगळ्यांना आवडणारी अशी आहे.

• आवळा मुरांबा बनवण्यासाठी लागणारे साहित्य

1 किलो आवळा,

दिड किलो साखर,

6 कप पाणी,

2 चमचे चुना,

1 चमचा लिंबाचा रस

• आवळ्याचा मुरांबा बनवण्याची कृती

आवळ्यांमध्ये एखाद्या वस्तूच्या मदतीने होल करुन घ्या. आता लिंबू पिळलेल्या पाण्यामध्ये सर्व आवळे रात्रभर भिजत ठेवा. सकाळी स्वच्छ पाण्यामध्ये आवळे धुवून, पिळून घ्या. त्यानंतर गरम पाण्यात ते आवळे शिजायला ठेवा.

आवळे शिजल्यानंतर पाणी काढून टाका. आता दुसऱ्या भांड्यात 6 कप पाणी, लिंबाचा रस, आणि साखर टाकून पाक बनवून घ्या. छान पाक बनल्यावर त्यात आवळे टाका. मंद आचेवर 5 मिनिट ते शिजवून घ्या. त्यानंतर आवडीनुसार इलायची पुड टाका. बनवलेला हा मुरांबा थंड झाल्यावर मस्त खा आणि त्यानंतर हवाबंद डब्यामध्ये भरुन ठेवा.