Harry Kane, Lionel Messi and Cristiano Ronaldo Football Records: फुटबॉलविश्वासाठी गुरुवार आणि शुक्रवार रेकॉर्डब्रेक राहिला. या दोन दिवसात काही आंतरराष्ट्रीय सामने झाले. या सामन्यांमध्ये लिओनेल मेस्सी, ख्रिस्तियानो रोनाल्डो, हॅरि केन असे दिग्गज खेळताना दिसले. दरम्यान, या तिघांनीही विविध विक्रमही नोंदवले. याच विक्रमांचा घेतलेला आढावा.

इंग्लंडचा दिग्गज खेळाडू हॅरि केनने वेन रुनीचा मोठा विक्रम मागे टाकला आहे. युरो 2024 स्पर्धेच्या पात्रता फेरीतील सामन्यात इंग्लंडने इटलीला 2-1 अशा गोलफरकाने पराभूत केले. या सामन्यात गोल करताना हॅरि केन इंग्लंडकडून सर्वाधिक गोल करणारा खेळाडू ठरला आहे.

हॅरि केनने इटलीविरुद्ध खेळताना इंग्लंडकडून कारकिर्दीतील 54 वा गोल नोंदवला. त्यामुळे त्याने वेन रुनीच्या 53 गोलच्या विक्रमाला मागे टाकले आहे. हा केनचा 81 वा आंतरराष्ट्रीय सामना ठरला.

याशिवाय अर्जेंटिनाने शुक्रवारी पनामाविरुद्ध एक मैत्रीपूर्ण आंतरराष्ट्रीय सामना खेळला. या सामन्यात अर्जेंटिनाने 2-0 अशा गोलफरकाने विजय मिळवला. यासामन्यादरम्यान मेस्सीने एक गोल केला. हा त्याच्या वरिष्ठ स्तरावर खेळताना केलेला कारकिर्दीतील 800 वा गोल ठरला.

तो ख्रिस्तियानो रोनाल्डोनंतर 800 करियर गोल करणारा दुसराच खेळाडू आहे. मेस्सीने आत्तापर्यंत बार्सिलोनासाठी 672 गोल केले आहेत, तसेच पॅरिस सेंट जर्मेनसाठी 29 आणि अर्जेंटिनासाठी 99 गोल केले आहे.

रोनाल्डोही गुरुवारी पोर्तुगालकडून लिश्टनस्टाइनविरुद्ध सामना खेळला. या सामन्यात पोर्तुगालने 4-0 असा विजय मिळवला. हा सामना रोनाल्डोसाठी आंतरराष्ट्रीय कारकिर्दीतील 197 वा सामना ठरला. त्यामुळे रोनाल्डो सर्वाधिक आंतरराष्ट्रीय सामने खेळणारा खेळाडू ठरला आहे.

रोनाल्डोने सर्वाधिक आंतरराष्ट्रीय सामने खेळणाऱ्या फुटबॉलपटूंच्या यादीत कुवेतच्या बाडेर अल-मुतवाला मागे टाकले आहे. त्याने 196 आंतरराष्ट्रीय सामने खेळले आहेत.