Accident Death Case

गरोदर बायकोला भेटण्यासाठी गोव्यातून गावी गेलेल्या तरुणाला बिहारमधील तेलाध गावाजवळ वाळूने भरलेल्या ट्रॅक्टरने चिरडले. तरुण शौचानंतर परत येताना गुरुवारी (दि.09) रात्री आगियाव बाजार पोलीस ठाण्याच्या हद्दीत ही घटना घडली.

सनी श्रावण पासवान (24, तेलाध) असे मृत तरुणाचे नाव आहे. तो गोव्यात कुठल्यातरी कंपनीत कामाला होता. काही दिवसांपूर्वीच तो गरोदर पत्नीला भेटण्यासाठी गावी आला होता. अपघातानंतर ट्रॅक्टर चालकाने घटनास्थळावरुन पळ काढला.

मृत सनी वीस दिवसांपूर्वी पत्नीची प्रकृती जाणून घेण्यासाठी आणि कुटुंबीयांची भेट घेण्यासाठी गावी आला होता. गुरुवारी सायंकाळी उशिरा शौचासाठी तो घराबाहेर पडला असता, भरधाव वेगात असलेल्या वाळूने भरलेल्या ट्रॅक्टरने त्यांना चिरडले.

अपघाताची माहिती मिळताच कुटुंबीय घटनास्थळी दाखल झाले, दरम्यान तोपर्यंत त्याचा मृत्यू झाला होता. पोलिसांनी घटनास्थळी दाखल होत पंचनामा केला आणि मृतदेहाचे शवविच्छेदन करण्यासाठी पाठविण्यात आला.

अपघातानंतर मृत सनीच्या घरी चिंतेचे वातावरण आहे. तीन भाऊ आणि दोन बहिणींमध्ये सनी पासवान चौथा होता. त्यांना दीड वर्षाची मुलगीही आहे. मृताची पत्नी शोभा देवी यांच्यासह कुटुंबातील सर्व सदस्यांनी फरार ट्रॅक्टर चालकाच्या अटकेची मागणी केलीय.