वाळपई: नळाच्या पाण्यात कीड आढळण्याचे प्रकार वाढत असतानाच आता गटारावरील लादीवर साचलेल्या पाण्यातही अशीच कीड आढळल्याने नागरिकांमध्ये चिंता व्यक्त केली जात आहे. गेल्या महिन्यात सर्वप्रथम वाळपईतील प्रभाग ९ मध्ये नळाच्या पाण्यात कीड आढळली होती. त्यानंतर झर्मे आणि वाळपई प्रभाग ८ मध्येही अशाच प्रकारच्या किडी नळाच्या पाण्यात सापडल्या होत्या.

या घटना ताज्या असतानाच रविवारी सकाळी वाळपई येथील गटारावरील लादीवर साचलेल्या पाण्यातही कीड आढळून आली. त्यामुळे ही कीड नेमकी कुठून येते, कशी तयार होते आणि तिचा उगम काय आहे, असा प्रश्न उपस्थित होत आहे. यापूर्वी वाळपईतील पाणीपुरवठा खात्याने संबंधित भागांमध्ये घराघरांत जाऊन पाण्याच्या टाक्या व जलवाहिन्या स्वच्छ केल्या होत्या.

मिळालेल्या माहितीनुसार, वाळपई येथील गोवा बागायतदार सोसायटीसमोर असलेल्या एका दुकानाबाहेर उभ्या असलेल्या मालकाची नजर गटारावरील लादीवर साचलेल्या पाण्याकडे गेली असता त्यांना प्रथम पांढऱ्या रंगाचे नूडल्ससारखे काहीतरी दिसले. बारकाईने पाहिल्यानंतर ते नळाच्या पाण्यात पूर्वी आढळलेल्या किडीसारखेच असल्याचे लक्षात आले. त्यानंतर त्यांनी पत्रकार व इतर नागरिकांना याबाबत माहिती दिली.

आरोग्य विभागाने शोध घ्यावा

वाळपई शहरात अनेक ठिकाणी घरांमधील सांडपाणी थेट गटारात सोडले जाते. अनेक गटारे तुंबलेल्या अवस्थेत आहेत. या साचलेल्या पाण्यात ही कीड निर्माण होत असेल का, याचाही शोध घेण्याची गरज व्यक्त होत आहे. आरोग्य खात्याने पुढाकार घेऊन वाळपईतील सर्व गटारांची पाहणी करावी तसेच या किडीचा आरोग्यावर किती परिणाम होऊ शकतो याबाबत सविस्तर अहवाल सादर करावा, अशी मागणी नागरिकांकडून होत आहे.