डिचोली: मॉन्सूनपूर्व कामांतर्गत डिचोलीतील शिरोडकर सभागृहाच्या मागील बाजूच्या नाल्यातील गाळ उपसण्यात येणार आहे. जलस्रोत खात्यातर्फे हे काम करण्यात येणार आहे. शनिवारी (ता. 14) डिचोलीचे आमदार डॉ. चंद्रकांत शेट्ये यांच्या हस्ते नारळ वाढवून या कामाला प्रारंभ करण्यात आला.

यावेळी नगरसेवक अनिकेत चणेकर, माजी उपनगराध्यक्ष नारायण बेतकीकर, जलस्रोत खात्याचे कार्यकारी अभियंता के. पी. नाईक, अभियंता नरेश पोकळे यांच्यासह रोहिदास पळ आदी नागरिक उपस्थित होते. शिरोडकर सभागृहाच्या मागील बाजूने गेलेल्या नाल्यातील गाळ उपसला नाही, तर पावसाळ्यात हा नाला तुंबून पाणी बाहेर फुटते. तेव्हा हा नाला लवकरात लवकर उपसा असे निर्देश आमदार डॉ. शेट्ये यांनी यावेळी संबंधीत खात्याच्या अधिकाऱ्यांना दिले. नाल्यातील गाळ उपसल्यानंतर पावसात नाला तुंबून समस्या निर्माण होणार नाही, असे अनिकेत चणेकर यांनी सांगून समाधान व्यक्त केले.