Women Reservation Bill: गोवा विधानसभेचे विरोधी पक्षनेते युरी आलेमाव यांनी लोकसभेत मंजूर झालेले महिला आरक्षण विधेयक योग्य दिशेने टाकलेले एक पाऊल असल्याचे म्हटले आहे.

पण, गोव्यातील महिलांना आरक्षणाचा फायदा मिळण्यासाठी 2032 ची वाट पाहावी लागेल असेही त्यांनी म्हटले आहे. जनगणनेला उशीर झाला आहे, जनगणनेनंतरच मतदारसंघांचे नवीन सीमांकन होऊ शकते. त्यामुळे आरक्षण लागू होण्यास विलंब होईल असे त्यांनी म्हटले आहे.

'जनगणनेच्या पहिल्या अहवालानंतर नवीन सीमांकन सुरू होईल. याचा अर्थ महिला आरक्षण विधेयक 2032 च्या गोवा विधानसभा निवडणुकीत प्रभावी होऊ शकते. जर ही प्रक्रिया लवकर पूर्ण झाली तर 2029 च्या लोकसभा निवडणुकीत आरक्षण मिळू शकते किंवा 2034 च्या निवडणुकांची वाट पहावी लागेल,' असे युरी म्हणाले.

काँग्रेसने नेहमीच महिला सक्षमीकरणला प्राधान्य दिले आहे, म्हणूनच हे विधेयक लवकरात लवकर लागू होईल अशी पक्षाला आशा आहे. असेही अलेमाव म्हणाले.

कृतीच्या मागील हेतू कृती चांगली किंवा वाईट हे ठरवत असते. भाजप सरकारने आणलेले महिला आरक्षण विधेयक लाखो भारतीय महिला, मुली आणि इतर मागासवर्गीयांच्या आशांचा विश्वासघात आहे. असा आरोप आलेमाव यांनी केलाय.