मडगाव: गोव्यावर ओढवलेल्या कोरोनाच्या संकटांतून गोवेकरांना वाचवावे तसेच येत्या निवडणुकीत कॉंग्रेसला विजय मिळावा यासाठी गोवा प्रदेश महिला कॉंग्रेसने गोव्यातील विविध मंदिरे,चर्चेस, मशिदी व गुरुव्दारांमध्ये जाऊन प्रार्थना केल्या.महिला कांग्रेस अध्यक्षा बीना नाईक (Bina Naik), अ.भा. महिला कॉंग्रेसच्या गोवा प्रभारी डा. सीमा फर्नांडिस, गोव्यातील विविध गट महिला कॉंग्रेसच्या अध्यक्षांनी या आठवड्यात विविध धार्मिक स्थळांमध्ये जाऊन देवदेवतांना साकडे घातले. (women congress memebers in goa pray to god)

फातर्पा येथील शांतादुर्गा कुंकळ्ळीकरीण संस्थान, फोंडा यथील सफा मशिद, जुने गोवे येथील सेंट झेवियर चर्च व बेती येथील गुरुव्दारांमध्ये जाऊन ही करुणा भाकली. बीना नाईक यांनी सांगितले, की कोविड 19 च्या गत लाटेत साडेतीन हजारावर गोमंतकीय प्राणास मुकले. सरकारच्या बेजबाबदारपणामुळे व रुग्णांना वेळीच प्राणवायुचा पुरवठा न झाल्याने अनेकांना प्राण गमवावा लागला. यावेळीही तसेच होण्याची भीती वाटत असल्याने ते टाळण्यासाठी महिला कॉंग्रेसने (Goa Congress) विविध मंदिरे,मशीद,चर्च गुरूद्वारा आदी ठिकाणी जाऊन ही प्रार्थना केली व लोकांना वाचवावे, सरकारच्या (Goa Government) नाकर्तेपणाची शिक्षा लोकांना देऊ नका अशी प्रार्थना केली. कॉंग्रेसने सरकारला निवेदन सादर करून कोविडसंबंधी खबरदारी घेण्याची विनंती केली आहे.