Govt Job to Miss Deaf India 2023: मोरजी गावाचे नाव जगाच्या नकाशावर नेण्याचे काम विनिता शिरोडकर हिने केले आहे. तिला सरकारी नोकरीची आवश्यकता आहे. सरकार दरबारी प्रयत्न करून प्राधान्याने विनिताला नोकरी उपलब्ध करून देऊ, अशी ग्वाही मांद्रे मतदारसंघाचे आमदार जीत आरोलकर यांनी दिली.

‘मिस डेफ वर्ल्ड’ स्पर्धेमध्ये आफ्रिकेत झालेल्या स्पर्धेत चौथ्या क्रमांकाची विजेती ठरलेल्या विनिताची तिच्या निवासस्थानी भेट घेऊन आरोलकर यांनी तिला नोकरीबाबत आश्‍वस्त केले.

यावेळी पंचसदस्य फटू शेटगावकर, केशव शेटगावकर, तियात्रिस्त फर्नांडिस उपस्थित होते. विनिताने याच वर्षी झालेल्या ‘मिस डेफ इंडिया’ स्पर्धेमध्ये प्रथम क्रमांक पटकावल्यानंतर तिने आफ्रिकेत झालेल्या स्पर्धेमध्ये भारताचे नेतृत्व केले आणि चौथा क्रमांक पटकावला.

आमदार आरोलकर म्हणाले की, विनिताने गोव्याचा नावलौकिक वाढवला आहे. तिचे आणि तिच्या आईचे परिश्रम सर्वांनाच ठाऊक आहेत. विनिताला सरकारी नोकरीची गरज आहे. यासंदर्भात मुख्यमंत्री डॉ. प्रमोद सावंत यांच्याशी चर्चा करून विनिताला प्राधान्याने सरकारी नोकरी मिळवून देण्यासाठी प्रयत्न करणार आहे.