प्रसिद्ध स्टँडअप कॉमेडियन वीर दासने (stand-up comedian Vir Das) केलेल्या 'भारतविरोधी' वक्तव्याबद्दल गोव्यातील हिंदू संघटना आक्रमक झाल्या आहेत. वीर दास माफी मागत नाही तोपर्यंत त्याला विरोध कायम राहणार असल्याचे हिंदू जनजागृती समितीने (Hindu Janajagruti Samiti) म्हटले आहे. काही संघटनांनी केलेल्या विरोधानंतर वीर दासचा बंगळुरू येथील शो रद्द करण्यात आला आहे. त्यानंतर गोव्यातील हिंदू जनजागृती समितीने देखील आक्रमक भूमिका घेतली आहे.

कॉमेडियन दासचे कार्यक्रम होतील तिथे त्यांची संघटना आंदोलन करत राहील. अशी माहिती हिंदू जनजागृती समितीचे राष्ट्रीय प्रवक्ते रमेश शिंदे यांनी पीटीआयला दिली आहे. वीर दासने गेल्या वर्षी अमेरिकेत "मैं दो भारत से आता हूँ" ही कविता सादर केली होती, ज्यावरून देशात बराच वाद निर्माण झाला होता. या कवितेतून देशाची बदनामी केल्याचा आरोप दासवर करण्यात आला आहे.

रमेश शिंदे म्हणाले, “कॉमेडियन वीर दासने अमेरिकेत केलेल्या भारताविरोधात वक्तव्याबद्दल त्याने माफी मागावी. आमचा त्याच्या विधानाला विरोध आहे, आम्ही विरोध केला नाही तर आम्ही त्याच्या बोलण्याचे समर्थन करतो असा त्याचा अर्थ होईल."

गुरुवारी हिंदू उजव्या विचारसरणीच्या संघटनांनी केलेल्या निषेधानंतर, स्टँडअप कॉमेडियन वीर दासचा बेंगळुरूमधील नियोजित शो शेवटच्या क्षणी रद्द करण्यात आला.