RG Loksabha candidate Asset

गोव्यातून आज (गुरुवार) रिव्हॉल्युशनरी गोवन पक्षाच्या उमेदवारांनी लोकसभेसाठी उमेदवारी अर्ज दाखल केले. उत्तरेतून मनोज परब तर दक्षिणेतून रुबर्ट परेरा यांनी उमेदवारी अर्ज दाखल केला. अर्ज दाखल करताना आरजीचे नेते आणि कार्यकर्ते उपस्थित होते.

आरजीच्या उमेदवारांनी दाखल केलेल्या शपथपत्रातून समोर आलेल्या माहितीनुसार, आरजीचे अध्यक्ष आणि उत्तर गोवा उमेदवार परब यांच्यापेक्षा दक्षिण गोवा उमेदवार परेरा अधिक श्रीमंत आहेत.

मनोज परब यांनी प्रतिज्ञापत्रातून दिलेल्या माहितीनुसार, त्यांची एकूण संपत्ती 3.12 लाख असल्याचे समोर आले आहे. परब यांनी 2022-23 वर्षासाठी दाखल केलेल्या आयकर परताव्यानुसार त्यांनी कोणतेही उत्पन्न दाखवलेले नाही. परब यांची 42,649 रुपयांची मुदतठेव असून, एमपी लाईफस्टाईल कंपनीचे शंभर रुपयांचे 900 शेअर्स त्यांच्याकडे आहेत.

याशिवाय त्यांच्याकडे दीड लाख रुपयांची एक कार देखील असल्याची त्यांनी माहिती दिली आहे. परब यांच्याविरोधात पाच गुन्हे दाखल आहेत, असे प्रतिज्ञापत्रात म्हटले आहे.

तर, रुबर्ट परेरा यांनी 27.63 लाखांची मालमत्ता असल्याची शपथपत्रातून माहिती दिली आहे. परेरा यांच्या आयकर परताव्यानुसार, त्यांचे 2.65 लाख उत्पन्न असल्याचे समोर आले आहे. परेरा यांनी बारवीनंतर आयटीआयचे शिक्षण घेतले आहे. त्यांच्याविरोधात एक गुन्हा दाखल आहे.

इंडिया आघाडीसोबत चर्चेसाठी अद्याप पर्याय खुला

परब यांनी पत्रकार परिषदेत दिलेल्या माहितीनुसार, आरजीचा इंडिया आघाडीत सामील होण्याचा पर्याय अद्याप खुला असून, यासाठी आघाडीला २० एप्रिलपर्यंत मुदत दिली आहे.

दरम्यान, आघाडीत समील होण्यासाठी आरजीने तीन अटी ठेवल्या आहेत. यात म्हादईचे संरक्षण, कोमुनिदाद जागेवरील बेकायदेशीर घरांवर कारवाई आणि पोगोची स्विकृती यांचा समावेश आहे.