Manoj Parab

रिव्हॉल्युशनरी गोवन्स पक्षाच्या दोन्ही उमेदवारांनी गुरुवारी (दि.१९) लोकसभेसाठी अर्ज दाखल केले. उत्तरेतून पक्षप्रमुख मनोज परब आणि दक्षिणेतून रुबर्ट परेरा यांनी अर्ज दाखल केला आहे. अर्ज दाखल करताना पक्षाच्या वतीने शक्तप्रदर्शन केले.

परब यांनी निवडणूक आयोगाकडे दाखल केलेल्या प्रतिज्ञापत्रानुसार त्यांच्याविरोधात पाच गुन्हे दाखल असल्याची माहिती समोर आली आहे.

परब यांच्या प्रतिज्ञापत्रात त्यांच्याविरोधात दाखल असलेल्या गुन्ह्याची माहिती देण्यात आली आहे. परब यांच्याविरोधातील सर्व गुन्हे सार्वजनिक मुद्यांवर केलेल्या आंदोलनांशी संबधित आहेत.

माहितीनुसार, वाळपई पोलिस स्थानकात दोन तर पणजी, फोंडा आणि म्हापसा पोलिस स्थानकात प्रत्येकी एक गुन्हा नोंद असून, सर्व प्रकरणात न्यायालयात खटले सुरु आहेत.

'ते' पाच गुन्हे कोणते?

मनोज परब यांनी फेसबुक पोस्टद्वारे दिलेल्या माहितीनुसार, मेळावली येथील आयआयटीच्या प्रकरणात दोन, स्थलांतरीतांचे बेकायदेशी वास्तव्य प्रकरणी एक, कुचेलीचे मैदान बचावासाठी केलेले आंदोलन आणि माजी मुख्यमंत्री लक्ष्मीकांत पार्सेकर यांच्या मेहुण्याच्या भ्रष्टाचार विरोधात केलेले आंदोलन याप्रकरणी एक, असे एकूण पाच गुन्हे नोंद असल्याची माहिती परब यांनी दिली आहे.

दरम्यान, माझं आयुष्य गोवा आणि गोयंकारांसाठी समर्पित असून, माझा लढा असाच सुरु राहील असे त्यांनी म्हटले आहे.