काणकोण : काणकोणातील बामणबुडो, तुडला व कुस्के धबधबे वाहू लागले आहेत. मात्र, पावसाने अद्याप गती न घेतल्याने ते पूर्ण क्षमतेने वाहण्यास सुरूवात झाली नसली तरी धबधब्याचे मनोहारी सौंदर्य अनुभवण्यासाठी पर्यटकांचे या धबधब्यांकडे पाय वळू लागले आहेत. (b)

शनिवार, रविवार व सुट्टीच्या दिवसात देशी व परदेशी पर्यटक या धबधब्याचा मनसोक्त आनंद लुटताना दिसत आहेत. बामणबुडो हा धबधबा गावडोंगरी पंचायत क्षेत्रात गावडोंगरी नेत्रावळी रस्त्याच्या आंबेघाट परिसरात रस्त्याच्या कडेला आहे. त्यामुळे हा धबधबा पर्यटकांची गर्दी खेचत आहे. याच पंचायत क्षेत्रात तुडल येथे दुसरा धबधबा आहे. (Tourism News in Goa)

खोतीगाव पंचायत क्षेत्रात कुस्के येथे खोतीगाव अभयारण्याच्या कक्षेत कुस्के हा धबधबा असून या धबधब्यावर जाण्यासाठी वनखात्याची परवानगी आणि प्रवेश शुल्क भरावा लागतो. वनखात्याने या धबधब्याकडे जाण्यासाठी पायवाट तयार केली आहे. हा धबधबा काणकोण मधील अन्य धबधब्यापेक्षा सर्वाधिक उंचीवरून पडणारा धबधबा आहे. हे सर्वच धबधबे काणकोण तालुक्याच्या चावडी या मध्यवर्ती ठिकाणाहून सुमारे वीस किलोमीटर अंतरावर आहेत. मात्र, अद्याप या धबधब्याचा विकास पर्यटनाच्या दृष्टीने करण्यात आला नाही.