Water Shortage Problem: भारतीय हवामान खात्याने राज्यात मॉन्सून दाखल झाल्याचे जाहीर केले आहे. मात्र, ढग कोरडे आणि पाऊस गायब झाला आहे.

अशातच हवामानाचा अभ्यास करणाऱ्या स्कायमेट या खासगी जागतिक संस्थेने पुढील चार आठवडे भारतातील मॉन्सून कमजोर असेल असे जाहीर केले आहे.

त्यामुळे राज्यासह देशासमोरचे पाण्याबाबतचे संकट आता तीव्र होताना दिसत आहे. यासाठी राज्य सरकारच्या जलसंपदा विभागाने पर्यायी पाण्याच्या व्यवस्थेसाठी हालचाली सुरू केल्या आहेत.

जलसंपदा विभागाचे मुख्य अभियंते प्रमोद बदामी म्हणाले, राज्यात सध्या पिण्यासाठीचे पाणी उपलब्ध आहे. खांडेपार, ओपा आणि म्हादईमध्ये पुरेसे पाणी आहे. मात्र, अंजुने धरणाचा पाण्याचा साठा कमालीचा कमी झालेला आहे.

तो केवळ 4 टक्के उरला आहे. यावर पुढील आठवडाभर पाणी प्रकल्प चालवता येतील. त्यामुळे केरी परिसरात पाणीटंचाई तीव्र होऊ शकते.

स्कायमेट या संस्थेने यापूर्वी जाहीर केलेल्या अंदाजानुसार यंदाचा देशातला मॉन्सून सरासरीपेक्षा कमी असेल.

अरबी समुद्रात निर्माण झालेल्या बिपरजॉय या चक्रीवादळामुळे सर्वांचेच अंदाज चुकवत नैऋत्य मौसमी मॉन्सून आठ दिवस उशिरा 8 जूनला केरळमध्ये दाखल झाला आणि तो झपाट्याने विक्रमी वेळेत अवघ्या चार दिवसांत केरळ, तमिळनाडू, कर्नाटक, गोवा करत महाराष्ट्रात दाखल झाला.

हवामान खात्याने मॉन्सूनची वाटचाल कायम असल्याचे सांगितले असले, तरी पावसाने मात्र ठेंगा दाखवला आहे. राज्यात आज आभाळ कोरडे आणि निरभ्र अनुभवास आले

पंचवाडी धरण कोरडे झाले आहे. मात्र, तिळारी, साळावली, आमठाणे आणि चापोली धरणात जूनपर्यंत पुरेल इतका पाणीसाठा आहे. कमी झालेले पाणीसाठे हा चिंतेचा विषय आहे.

पाऊस लांबल्यास अन्य विभागातून पाणी वळवण्यासाठी काय करता येऊ शकेल यावर अभ्यास सुरू आहे. सध्या याबाबत कोणतीच यंत्रणा नाही, मुख्य अभियंते प्रमोद बदामी म्हणाले.

महाराष्ट्रातील तिळारी धरणातून उत्तर गोव्यासाठी मोठ्या प्रमाणात पाणीपुरवठा केला जातो. या धरणात पुरेसा पाणीसाठा आहे.

सध्या साळावली धरणातून २.५० क्युबिक मीटर आणि अंजुने धरणातून १.२० क्युबिक मीटर पाणी सोडण्यात येत आहे.