राज्‍यात मुसळधार पाऊस पडत असूनही मागील दोन आठवड्यांपासून चिखली-कोलवाळ येथील नळ कोरडे असल्‍याने संताप व्‍यक्त करण्‍यात येत आहे. या गावातील सुमारे दीडशे ते दोनशे घरांना पाणीटंचाईला सामोरे जावे लागत आहे.

याबाबत बोलताना कोलवाळ सरपंच दशरथ बिचोलकर यांनी सांगितले की, चिखली गावात मागील १४ दिवसांपासून पाण्याची समस्या जटील बनली आहे. पाणीपुरवठा विभागाच्या अधिकाऱ्यांना या समस्येची माहिती देण्‍यात आली, परंतु त्‍यांच्‍याकडून फक्त आश्‍‍वासनेच मिळाली.

कोलवाळ ग्रामपंचायतीच्या प्रभाग ३ व ४ मध्ये हा चिखली गाव येतो. तेथील नळांना गेले १४ दिवस पाणी न येण्याचा प्रकार यावर्षी पहिल्यांदाच घडलाय. गावातील मुख्य जलकुंभातच पाणी नसल्यामुळे नळ कोरडे पडले आहेत. हा प्रकार असाच सुरू राहिल्यास सार्वजनिक बांधकाम खात्‍यावर धडक मोर्चा नेण्याचा इशारा चिखलीवासीयांनी दिला आहे.