‘सरकारच्या घोषणाच मोठ्या’, असे म्हणण्याची वेळ खोतीगावातील कुस्के या वाड्यावरील रहिवाशांवर आली आहे. या वाड्याला दिवसाकाठी एक तासही पाणीपुरवठा होत नाही. मात्र, येथील गजानन वेळीप यांना 16 हजार लिटरचे पाणी बिल आल्यामुळे संताप व्यक्त करण्यात येत आहे.

पाणीपुरवठा खात्याच्या निर्देशाप्रमाणे ग्राहकास दरमहा 16 हजार लिटरपर्यंत मोफत पाणी पुरवठा होतो. मात्र, तब्बल सहा महिन्यांनी पाणी बिल आल्यानंतर ते 16 हजार लिटरपेक्षा जास्त झाल्याने त्याचा नाहक भुर्दंड बसत असल्याचे कुस्के - खोतीगाव येथील ग्राहक गजानन पावटो वेळीप यांनी सांगितले. पाणी खात्याने ग्राहकाला दरमहा पाणी बिल देणे बंधनकारक आहे.

पाणीपुरवठा खाते 16 हजार लिटरपर्यंत पाणी मोफत देते. मात्र, त्यानंतर एक लिटरही पाण्याचा जास्त वापर झाल्यास त्याचे सरसकट बिल ग्राहकांच्या माथी मारण्यात येते. याबद्दल वेळीप यांनी नाराजी व्यक्त केली आहे.

यासंबंधी बांधकाम मंत्री नीलेश काब्राल हे ‘सरकार तुमच्या दारी’ कार्यक्रमात आल्यानंतर नगराध्यक्ष रमाकांत नाईक गावकर यांनी ही बाब मंत्र्यांच्या निदर्शनास आणली होती. तसेच सहा महिन्यांनी एकत्रित पाणी बिले दिली जातात, अशीही ग्राहकांची तक्रार आहे.