Covid-19 Antigen Test Mandatory in Goa GMC: राज्यातील उपजिल्हा, जिल्हा आणि गोवा वैद्यकीय महाविद्यालयात उपचारासाठी येणाऱ्या सर्व रुग्णांची अँटीजन चाचणी अनिवार्य असेल, अशी माहिती आरोग्यमंत्री विश्वजीत राणे यांनी दिली.

केंद्र सरकारच्या आरोग्य प्रशासनाने दिलेल्या निर्देशानुसार राज्यातील गोवा वैद्यकीय महाविद्यालय इस्पितळ आणि दक्षिण गोवा जिल्हा इस्पितळात कोरोनासंबंधित मॉक ड्रिल झाले. यावेळी आरोग्यमंत्री राणे, सचिव अरुणकुमार मिश्रा, रुग्णालयाचे डीन डॉ. शिवानंद बांदेकर उपस्थित होते.

राणे म्हणाले, केंद्र सरकारच्या निर्देशानुसार आम्ही आज हे मॉक ड्रिल केले आहे. कोविडची कोणतीही स्थिती हाताळण्यासाठी राज्य प्रशासन तयार असून कोरोनासंबंधीची उपाययोजना यासंबंधीचा आढावा घेण्यात आला. यात रुग्णांसाठी लागणारे कोविड स्वतंत्र कक्ष, खाटांची संख्या यांचा आढावा घेण्यात आला.

उपचार कक्ष आणि खाटा वाढविणार

आरोग्यमंत्री विश्वजीत राणे म्हणाले, राज्यात अत्यावश्यक वैद्यकीय साधनसुविधा उपलब्ध असून सध्या दोन्हीही रुग्णालयांत स्वतंत्र 30-30 खाटांची व्यवस्था करण्यात आली आहे.

जर कोरोनाबाधितांची संख्या वाढली आणि अधिकच्या उपचारासाठी त्यांना रुग्णालयात भरती करावे लागले, तर खाटांची संख्या आणि कोविड कक्ष वाढविण्यात येतील. सध्या तशी आवश्यकता नाही.