देशासह राज्यातही कोरोना बाधितांचे प्रमाण वाढत आहे. हा संसर्ग नियंत्रणात ठेवण्यासाठी सर्व सरकारी इस्पितळांमध्ये दाखल होणाऱ्या रुग्णांची अँटीजन चाचणी करण्यासह आवश्‍यकता भासल्यास ‘आरटीपीसीआर’ चाचणीही करण्यात येत आहे.

तसेच गोमेकॉतील वैद्यकीय पथकाला जिनोम सिक्वेन्सिंग मशीनरी कार्यान्वित करण्याचे निर्देश दिले आहेत. कोरोनाविषयक मार्गदर्शक सूचनांनुसार, संसर्गाच्या प्रकाराचा शोध घेतला जाणार असल्याची माहिती आरोग्यमंत्री विश्‍वजीत राणे यांनी दिली.

केंद्रीय आरोग्यमंत्री मनसुख मांडविया यांनी देशातील विविध राज्यांमधील कोविड संसर्गाची स्थिती तसेच त्यासाठीची राज्यांनी केलेल्या तयारीचा आढावा घेण्यासाठी आज ऑनलाईन बैठक घेतली. या बैठकीला राज्याचे आरोग्यमंत्री विश्‍वजीत राणे उपस्थित होते.

गोव्यात कोरोना संसर्ग रोखण्यासाठी ठिकठिकाणची इस्पितळे तसेच आरोग्य केंद्रांत अँटीजन चाचण्या सुरू केल्याची माहिती त्यांनी दिली. गोव्यातील महामारीचा आढावा सादर केला. केंद्रीय आरोग्य मंत्रालयाकडून मिळणारे सहकार्य आणि मार्गदर्शन याबाबत राणे यांनी आभार व्यक्त केले.

10, 11 एप्रिलला मॉक ड्रिल

देशभरात कोरोनाला सामोरे जाण्यासाठी केलेल्या तयारीचा आढावा व त्याची तयारी याबाबत 10 व 11 एप्रिलला मॉक ड्रिलचे आयोजन केले आहे. त्यामध्ये आरोग्य खाते सहभागी होणार आहे. 8 व 9 रोजी जिल्हा प्रशासन आणि आरोग्य अधिकाऱ्यांसह आरोग्य सज्जतेचा आढावा घेण्यास सांगितले आहे.

अँटीजनसह गरज पडल्यास रुग्णांची ‘आरटीपीसीआर’ टेस्ट

कोरोनाची मार्गदर्शक तत्त्वे जारी करून त्यांचे पालन करण्याचे आवाहन लोकांना केल्याची माहिती राणे यांनी केंद्रीय मंत्र्यांना दिली. याशिवाय या महामारीला सामोरे जाण्यासाठी मागील अनुभवानुसार काही कठोर पावले उचलण्यात आल्याची माहिती आरोग्यमंत्र्यांनी दिली. केंद्रीय आरोग्यमंत्र्यांनी राज्यांना सतर्क राहण्याचा सल्ला दिला