पणजी: पणजी निवडणूक निर्वाचन अधिकारी व उपजिल्हाधिकारी ईशांत सावंत यांनी जुने गोवे पोलिसांना ॲड. आयरिश रॉड्रिग्ज यांनी रायबंदर चर्चचे सदस्य असलेल्या डॉमनिक फर्नांडिस यांच्याविरुद्ध दाखल केलेल्या तक्रारीची चौकशी करून आवश्यक ती कारवाई करण्याचे निर्देश दिले आहेत. रॉड्रिग्ज यांनी मुख्य निवडणूक आयोगाकडे तक्रार दाखल केल्यानंतर त्वरित पावले उचलण्यात आली आहेत.

पणजीचे उमेदवार असलेल्या बाबुश मोन्सेरात यांनी डॉमनिक फर्नांडिस यांना चाळीस लाख रुपये रायबंदर येथील मतदारांची मते मिळावी यासाठी दिले होते. फर्नांडिस यांनी मतदारांना मोन्सेरात यांना मतदान करण्यासाठी प्रवृत्त केल्याचा आरोप तक्रारीत ॲड. आयरिश रॉड्रिग्ज यांनी केला होता. रायबंदर चर्चमध्ये प्रार्थना कक्ष उभारण्यासाठी चाळीस लाख रुपये मिळाल्याची वस्तुस्थिती डॉमनिक फर्नांडिस यांनी तेथील मतदारांना सांगितली होती. त्याने ही रक्कम चर्च समितीशी किंवा चर्च धर्मगुरूंशी कोणतीही सल्लामसलत न करता हडप केली. अ‍ॅड. रॉड्रिग्स यांनी त्यांच्या तक्रारीची प्रत आयकर आयुक्त आणि सक्तवसुली संचालनालयालाही पाठवली आहे.