SGPDA: एसजीपीडीए घाऊक मासळी मार्केटमधील गोमंतकीय पारंपरिक मच्छीमारांचा प्रश्र्न अजूनही सुटलेला नाही. एसजीपीडीए घाऊक मासळी मार्केटमधील गोमंतकीय पारंपरिक मच्छीमारांचा प्रश्र्न अजूनही सुटलेला नाही. त्यांना कंत्राटदार रात्री 9 वा.नंतर मासळी विक्री करू देत नसल्याची तक्रार घेऊन मासळी विक्रेत्या महिला फातोर्डाचे आमदार विजय सरदेसाई यांच्या घरी गेल्या.

यावेळी सरदेसाई यांनी कंत्राटदाराला बोलावून या गोमंतकीय महिला मासळी विक्रेत्यांना रात्री १० वा.पर्यंत मासळी विक्री करू द्यावी, असे खडसावून सांगितले.

सरदेसाई यांनी सांगितले की, हे घाऊक मासळी मार्केट आपल्या मतदारसंघात आहे व गोमंतकीय पारंपरिक मासळी विक्रेत्यांच्या सदैव पाठिशी असेन. कंत्राटदार परप्रांतीयांना मासळी मार्केटात घेतो. मग गोमंतकीय मासळी विक्रेत्यांना का नाही, असा प्रश्र्न सरदेसाई यांनी कंत्राटदाराला विचारला.

परप्रांतीय विक्रेत्यांना घेतले नाही तरी चालेल; पण या गोमंतकीय मासळी विक्रेत्या महिलांवर अन्याय होता कामा नये, असेही सरदेसाई यांनी कंत्राटदाराला बजावले.

या महिला मासळी विक्रेत्यांनी सांगितले की, एरव्ही एसजीपीडीएने आम्हाला रात्री १० वा.पर्यंत येथे बसण्याची मुभा दिली होती. पण कंत्राटदार आम्हाला ९ वा.नंतर बसायला देत नाही. म्हणून आम्ही सरदेसाई यांची भेट घेतली. यापूर्वी त्याने आम्हाला पुष्कळ मदत केली आहे. आम्ही त्यांचे आभारी आहोत.