पणजी: मला कुणाचीही ‘ॲलर्जी’ नाही. त्‍यामुळे विधानसभेच्‍या येत्‍या पावसाळी अधिवेशनात ‘एकला चलो’ भूमिका नसेल असे म्‍हणतच, शत्रू केवळ चित्रपटातच नाही, तर विधानसभा सभागृहातही झोपतात, असा टोला आमदार विजय सरदेसाई यांनी बुधवारी कुणाचेही नाव न घेता लगावला.

विधानसभा अधिवेशन अवघ्‍या दोन दिवसांवर येऊन ठेपले असतानाच विरोधी काँग्रेस, गोवा फॉरवर्ड, आप आणि रिव्‍हॉल्‍युशनरी गोवन्‍स (आरजी) या पक्षांमधील दुफळी विविध माध्‍यमांतून वारंवार दिसून येत आहे.

अशा स्‍थितीत विरोधी आमदार म्‍हणून तुम्‍ही विरोधकांना साथ देणार, की ‘आरजी’चे आमदार वीरेश बोरकर यांच्‍याप्रमाणे ‘एकला चलो’ भूमिका घेणार, असा प्रश्‍न शनिवारी घेतलेल्‍या पत्रकार परिषदेत पत्रकारांनी सरदेसाई यांना विचारला. त्‍यावर त्‍यांनी प्रथम सावध भूमिका घेतली. मला कुणाचीही ॲलर्जी नाही.

दामूंच्‍या वक्तव्‍यातून व्‍होट बँकेचे राजकारण

कॅब ॲग्रिगेटर धोरणासह सरकारच्‍या इतर काही निर्णयांना खुद्द भाजप प्रदेशाध्‍यक्ष दामू नाईकच आक्षेप घेत आहेत. यातून प्रशासन कोलमडल्‍याचे दिसून येत आहे. सरकार घेत असलेल्‍या काही निर्णयांना दामू जो विरोध करीत आहेत, त्‍यातून विधानसभा निवडणुकीसाठी भाजप ‘व्‍होटबँक’ तयार करीत असल्‍याचे दिसून येते, अशी टीकाही सरदेसाई यांनी केली.

सभापती तवडकरांच्‍या मतदारसंघातही समस्या!

सभापती तथा काणकोणचे आमदार रमेश तवडकर यांना त्यांच्या मतदारसंघातील प्रश्‍न सभापती असल्‍यामुळे मांडता येत नाहीत. पण, त्‍यांच्‍या मतदारसंघातून माझ्याकडे अनेक प्रश्‍न आले आहेत. त्‍यामुळे यावेळी सभापतींच्‍या मतदारसंघातील प्रश्‍नही सभागृहात मांडू. त्‍यांचीही मला ॲलर्जी नाही, असे सरदेसाई यांनी नमूद केले.