सासष्टी: रावणफोंड-मडगाव येथील मिलिटरी कॅम्पजवळ आज सकाळी 8.30 वाजता झालेल्या अपघातात वेर्नोन फर्नांडिस (49, सुरावली) याचे निधन झाले. या अपघातात वेर्नोनच्या पत्नी, भाऊ व मुलाला किरकोळ मार लागला असून त्याच्यावर हॉस्पिसिओ इस्पितळात उपचार करुन त्यांना घरी पाठविण्यात आले आहे. (Vernon Fernandes dies in accident near Ravanaphond Margao military camp)

मडगाव पोलिसांकडून मिळालेल्या माहितीनुसार, ही घटना आज सकाळी 8.30 वाजता घडली. वेर्नोन हा चारचाकीने कुटुंबियासोबत मडगावच्या दिशेने जात होता. रावणफोंड येथील मिलिटरी कॅम्पजवळ पोहचल्यावर गतीरोधकावर चारचाकी जोराने आपटून वेर्नोनचा चारचाकीवरील नियंत्रण गेल्याने चारचाकी समोरील वीज खांबला धडकली आणि नंतर बाजूला असलेल्या रिक्षा, तीन दुचाकी, टी स्टॉल आणि स्वीट मार्टला चारचाकीने ठोकर दिली.

पोलिसांनी त्वरित घटनास्थळी पोहचून वेर्नोन याला त्वरित हॉस्पिसिओ इस्पितळात दाखल केले. पण, डॉक्टरांनी त्याला मृत घोषित केले. या अपघातात वेर्नोनच्या पत्नी वेनिया फर्नांडिस, भाऊ डेन्वर फर्नांडिस व मुलाला किरकोळ मार लागला असून त्याच्यावर उपचार करुन त्यांना घरी पाठविण्यात आले आहे. वेर्नोन हा खलाशी असून तो मुळचा सांजुझे आरियल येथील रहिवासी आहे. वेर्नोन याला अंतर्गत मार लागल्याने त्याचा मृत्यू झाला असावा, असा अंदाज पोलिसांकडून व्यक्त करण्यात येत आहे. याप्रकरणी पोलिस पुढील तपास करीत आहे.