Traditional Matoli Items In Goa Markets For Ganesh Chaturthi 2023: राज्यात चतुर्थीच्या पूर्वसंध्येला माटोळी साहित्य, घरगुती वस्तु, विद्युत साहित्य, कपडे, भुसारी सामान, आदी साहित्याची मोठ्या प्रमाणात खरेदी करण्यात आली असून राज्यातील सर्व बाजार आज फुलले होते. राज्यात उच्चांकी खरेदी झाल्याने आज कोट्यवधींची उलाढाल झाली.

राज्यात सर्वच साहित्याच्या दरात खासकरून फुले, फळे, मिठाई, सजावट तसेच माटोळी साहित्याच्या दरात मागील वर्षांच्या तुलनेत १० ते २० टक्क्यांची वाढ झाल्याच्या प्रतिक्रिया ग्राहकांतून व्यक्त होत आहेत.

पणजी बाजारात माटोळीसाठी लागणाऱ्या कांगल्या, घागऱ्या, विविध प्रकारची रानटी फळे, तसेच केळीचे घड, नारळाची शेल, दोडगी, भोपळा, तसेच केळीची पाने, माटोळी बांधण्यासाठी लागणारे वेल, सुपारी आदींना बाजार फुलला होता.

फळे-फुले महागली

चतुर्थी दरम्यान बाप्पाच्या पूजेसाठी लागणारी फुले महागली आहेत. बाप्पासाठी लागणारे फुलांचे हार १०० पासून ३५० रूपयांपर्यंत व त्याहून अधिक दरात विकले जात आहेत. पुढील आठवडाभर फुलांचे दर चढेच राहणार असल्याचे फुल विक्रेत्यांनी सांगितले.

बागायदार, मॉल हाऊसफुल्ल !

चतुर्थीच्या पूर्वसंध्येला राज्यात मोठ्या प्रमाणात खरेदी करण्यात आल्याने राज्यातील मॉल, बागायददार, सहकार भांडार तसेच इतर आस्थापने खरेदीसाठी हाऊसफुल्ल झाली होती. विविध मॉल मध्ये ग्राहकांना आकर्षित करण्यासाठी विविध ऑफर जाहीर करण्यात आल्याने मॉलमध्ये खरेदीला नागरिक अधिक पसंती देताना दिसले.