पणजी: महागाईने सर्वसामान्य जनतेचे कंबरडेच मोडले आहे. इंधनानंतर दूध दरातही वाढ झाली. हे कमी की काय, म्हणून आता दैनंदिन आहारातील अविभाज्य घटक असलेला भाजीपाला महागला आहे. यामुळे गृहिणींचे बजेटच कोलमडले आहे.

त्यातल्या त्यात कांदा, बटाटा आणि टोमॅटोचे दर गेल्या काही दिवसांपासून स्थिर आहेत. गेल्या आठवड्यात लिंबू 50 रुपयांना आठ मिळायचे. मात्र, आज लिंबूच्या दरात काही प्रमाणात घट झाली असून 5 रुपयांना एक या दराने लिंबू बाजारात विकले जात आहेत. शनिवारी पणजी मार्केटमध्ये भाजीपाला विपुल प्रमाणात उपलब्ध होता. गुढीपाडव्यानिमित्त सुट्टी असल्याने ग्राहकांची वर्दळदेखील वाढली होती. बाजारात सध्या मानकुराद, हापूस, पायरी, तोतापुरी, सेंदुरी आंब्यांची विक्री सुरू झाली आहे. मात्र, आंब्यांचे दर चढेच आहेत. 3 हजार रुपयांपासून 700 रुपये डझनपर्यंतचे आंबे बाजारात उपलब्ध आहेत. त्याचप्रमाणे रानमेवा देखील बाजारात दाखल झाला असून 50 रुपये एक माप असा दर आहे.

शहाळे, कलिंगडाने खाल्ला भाव

वाढत्या उन्हामुळे संत्री, मोसंबी, कलिंगड, शहाळे यासारख्या रसदार फळांना मागणी प्रचंड वाढली आहे. बाजारात खरेदीसाठी आलेले ग्राहक शहाळी, उसाचा रसाचा किंवा फळ रस घेताना दिसतात. 40 ते 50 रुपये प्रतिनग दराने शहाळे विकले जात असून कलिंगडालाही बाजारात मोठी मागणी आहे. 30 रुपये प्रतिकिलो दराने कलिंगडाची विक्री सुरू आहे.

दर प्रतिकिलो

कांदा ----------------------30

बटाटा ---------------------30

टोमॅटो ---------------------30

गवार ----------------------50

कोबी ---------------------40

गाजर ------------------70-80

बीन्स ------------------70-80

भेंडी-----------------------60

सीमला मिरची ---------------80

हिरवी मिरची --------120 ते 140

पालेभाजी प्रतिजुडी

मेथी ----------------------20

लाल भाजी -----------------10

कांदा पात ------------------20

मुळा ----------------------40

पालक ---------------------10

कोथिंबीर -------------------20

पुदिना ---------------------10

लिंबू ----------------5 रुपये एक