Vedanta Mineral Transport Bicholim Pilgao

डिचोली: मनाई असतानाही डिचोलीत ‘वेदांता’कडून रात्रीची खनिज वाहतूक सुरूच आहे.न्यायालयीन आदेशाचे उल्लंघन करून आजही (शुक्रवारी) रात्री उशिरापर्यंत खाणीवरून खनिज वाहतूक सुरू होती, असा आरोप पिळगावच्या नागरिकांनी केला असून, रात्रीची खनिज वाहतूक सुरू असतानाचे फोटो सादर केले आहेत.

मात्र, रात्री सुरू असलेली वाहतूक ही खनिज मालाची की ‘रिजेक्शन’ची ते मात्र समजू शकले नाही. न्यायालयाने मनाई केली असतानाही रात्रीच्यावेळी होणाऱ्या या वाहतुकीमुळे आश्चर्य व्यक्त होत आहे. रात्रीच्या या खनिज वाहतूक प्रकरणी रात्री उशिरापर्यंत डिचोली पोलिसात कोणतीही तक्रार नोंद झाली नव्हती.

रात्रीच्यावेळी खनिज वाहतूक करण्यात येत नाही, असा कंपनीचा दावा आहे, तर बंदी असतानाही डिचोलीतील खाणीवरून रात्रीच्यावेळी खनिज वाहतूक सुरू असल्याचे काल (गुरुवारी) झालेल्या सुनावणीवेळी पुराव्यानिशी निदर्शनास आणून दिल्यानंतर मुंबई उच्च न्यायालयाच्या गोवा खंडपीठाने या प्रकाराची गंभीर दखल घेतली. रात्रीची खनिज वाहतूक बंद करून तसे हमीपत्र देण्याचे निर्देश न्यायालयाने वेदांता कंपनीला दिले आहेत.

न्यायालयाच्या निर्देशांचे पालन; वेदांता

याविषयी वेदांता कंपनीने स्पष्टीकरणात म्हटले आहे की, वेदांता कंपनी खनिज वाहतुकीसंदर्भात आवश्यक ते नियम आणि न्यायालयाच्या निर्देशांचे पालन करत आहे. खाण भाडेपट्ट्याच्या क्षेत्रामध्ये मालाची वाहतूक केली जात आहे आणि प्राधिकरणाने मंजूर केलेल्या निर्धारित वेळेच्या पलीकडे कोणत्याही धातूची वाहतूक केली जात नाही. कारण सर्व्हरमध्ये निश्चित केलेल्या वेळेपेक्षा कोणतीही ट्रिप केली जाऊ शकत नाही.