पिसुर्ले: डिचोली शहराला टेकून असलेल्या लामगावच्या माथ्यावरील सेसा (वेदान्ता)चे खाणखंदक आता असुरक्षित असल्याचे दिसून येत आहे. सध्या या खाणखंदकाच्या एकाबाजूने मोठ्या प्रमाणात माती कोसळली आहे.

तसेच मुसळधार पावसामुळे पिसुर्ले या ठिकाणी गेल्या बारा वर्षांपासून बंद असलेल्या खनिज खाणीच्या खंदकामध्ये तुडुंब पाण्याचा साठा झालेला आहे. परंतु या ठिकाणी उपाययोजना करण्यात न आल्यामुळे पिसुर्ले गावासाठी संकट निर्माण झाले आहे. सरकारने या दोन्ही खाण खंदकांकडे वेळीच लक्ष देण्याची मागणी ग्रामस्थांनी केलेली आहे.

दरम्यान, सत्तरी तालुक्याचे उपजिल्हाधिकारी, मामलेदार व जलसिंचन खात्याने याकडे संयुक्तपणे उपाययोजना करण्यावर भर न दिल्यास यामुळे मोठ्या प्रमाणात धोका निर्माण होऊ शकतो.

सध्या पिसुर्ले गावातील नागरिकांमध्ये भीतीचे वातावरण निर्माण झालेले आहे. त्याचप्रमाणे गेल्या महिन्याप्रमाणे पुन्हा मुसळधार पर्जन्यवृष्टी झाली, तर खाणखंदक कोसळून डिचोली शहरासह लामगाव आणि मुळगाव या गावांवर मोठी आपत्ती ओढवण्याची शक्यता नाकारता येत नाही. तशी भीतीही स्थानिक व्यक्त करीत आहेत. धोकादायक खाणखंदक त्वरित खाली करून सुरक्षेच्यादृष्टीने खाणींवर प्रतिबंधात्मक उपाययोजना हाती घ्याव्यात, अशी मागणी जोर धरू लागली आहे.