वास्को : परप्रांतीय खलाशी कामगार आपापल्‍या गावांतून अजून परतले नसल्‍याने येथील खारीवाडा मच्‍छीमारी जेटीवर तशी सामसूमच आहे. अजून ७५ टक्के ट्रॉलर्स तेथेच नांगरून ठेवण्‍यात आलेले आहेत.

मासेमारीचा हंगाम १ ऑगस्‍टपासून सुरू झाला आहे. मात्र खारीवाडा मच्‍छीमारी जेटीवर ट्रॉलर्समालक, कामगारांची लगबग अजून दिसून येत नाही. पहिल्या दिवशी काही बोटी मासेमारीला गेल्या होत्या. त्‍यांना बऱ्यापैकी मासळी मिळाली. विशेष म्‍हणजे या जेटीची दुरुस्ती करण्याची गरज होती. परंतु ती मोसमापूर्वी झाली नाही.

त्यामुळे ट्रॉलर्समालकांना अनेक समस्‍यांचा सामना करावा लागतोय. काही ट्रॉलर्सचे नुकसानही झाले आहे. त्यांच्‍या दुरुस्तीसाठी पदरमोड करावी लागते, असे माजी मंत्री व गोवा फिशिंग बोटमालक संघटनेचे अध्यक्ष जुझे फिलिप डिसोझा यांनी सांगितले.

ट्रॉलर्सवर काम करणाऱ्या कामगारांच्या आरोग्याकडेही लक्ष देण्याची गरज आहे. जेटीवर सुलभ शौचालय व इतर सुविधा पुरविण्‍याची आश्‍‍वासने अनेक वेळा देण्‍यात आली, परंतु प्रत्यक्षात काहीच झाले नाही, असे डिसोझा यांनी सांगितले.

कामगार गावांहून अद्याप परतले नसल्याने तसेच बोटींच्‍या दुरुस्तीची कामे सुरू असल्याने सुमारे ७५ टक्के बोटी मासेमारीसाठी गेलेल्या नाहीत. तसेच खारीवाडा जेटीच्या दुरुस्तीकडे सरकारने म्हणावे तसे लक्ष न दिल्याने बोटमालकांना अनेक समस्‍या सतावत आहेत. जेटीवर सुलभ शौचालये बांधण्याचे आश्‍‍वासन देण्‍यात आले होते, परंतु त्‍याची अंमलबजावणी अजून झालेली नाही. - जुझे फिलिप डिसोझा, माजी मंत्री तथा गोवा फिशिंग बोटमालक संघटनेचे अध्यक्ष